खासदार सदाशिव लोखंडे यांच्यासह आर्थिक गुन्हे शाखेचे डिवायएसपी कमलाकर जाधव, पी.आय. बाळासाहेब राठोड, पी.आय. शेख, शहर पी.आय. भगवान मथुरे, पी.एस.आय. बाळासाहेब यादव, प्रशासकीय मंडळाचे अध्यक्ष अमोल वाघमारे, सदस्य नवनाथ बोडके यांनी उपोषणकर्त्यांची घेतली भेट
महाराष्ट्र संवाद न्यूज @ अनंत पांगारकर
नगर जिल्ह्याच्याच नव्हे तर राज्याच्या सहकार क्षेत्रात खळबळ उडवून देणाऱ्या दूधगंगा सहकारी पतसंस्थेच्या ८१ कोटी रुपयांच्या अपहार प्रकरणी मुख्य आरोपी भाऊसाहेब कुटे आणि इतर आरोपींना अटक करावी या प्रमुख मागणीसह ठेवीदारांच्या ठेवी परत मिळाव्यात यासाठी ठेवीदार संघर्ष समितीच्यावतीने संगमनेरचे प्रांत अधिकारी कार्यालयासमोर सुरू करण्यात आलेले जनआक्रोश आंदोलन आणि उपोषण तिसऱ्या दिवशीही सुरूच आहे.
दरम्यान या उपोषणाच्या दुसऱ्या दिवशी रविवारी शिर्डी लोकसभा मतदारसंघाचे खासदार सदाशिव लोखंडे यांनी भेट देऊन उपोषणकर्त्यांची विचारपूस केली. यावेळी त्यांचे समवेत भाजप शहर अध्यक्ष ॲड. श्रीराम गणपुले, शिवसेना (शिंदे गट) तालुका अध्यक्ष रमेश काळे, शहराध्यक्ष सोमनाथ कानकाटे उपस्थित होते.
गुन्हेगारांवर कारवाई केली जाईल असे आश्वासन देऊन याप्रकरणी लक्ष घालणार असल्याचे सांगत खासदार लोखंडे यांनी आर्थिक गुन्हे शाखेचे अधिकारी, तालुका उपनिबंधक यांना लवकरात लवकर २१ आरोपी, कर्जदार व जामीनदार यांच्यावर योग्य ती प्रशासकीय कारवाई करून ठेवी परत करण्यासाठी विशेष प्रयत्न करा, अशा सूचना दिल्या. छावा ब्रिगेडचे संस्थापक अध्यक्ष विश्वनाथ वाघ यांनी आंदोलकांची भेट घेऊन छावा ब्रिगेड संघटनेच्या वतीने पाठींबा जाहीर केला.
दूधगंगेच्या या महाघोटाळ्यात २१ संशयीतांवर गुन्हा दाखल करण्यात आला आहे. यापैकी फक्त सहाच आरोपींना अटक करण्यात आली होती. त्यातील काही आरोपी जमिनीवर देखील सुटले आहेत. परंतु या घोटाळ्यातील मुख्य आरोपी आणि सूत्रधार असलेला पतसंस्थेचा चेअरमन भाऊसाहेब कुटे, त्याचे कुटुंबीय यांच्यासह उच्चभ्रू प्रतिष्ठित आरोपी मात्र अद्यापही फरार आहेत.
पोलिसांच्या तपासाबाबत तीव्र नाराजी…
दोन महिने होत आले तरी आरोपी पोलिसांना सापडलेले नाहीत. अनेक वेळा तक्रारी व आंदोलनाचा इशारा देऊनही या आरोपींना पोलिसांनी अटक केलेली नाही. आर्थिक गुन्हे शाखा नगर यांच्याकडे हा तपास असून त्यांच्याकडून तपासात अद्यापर्यंत कोणतीही प्रगती झाल्याचे चित्र दिसत नाही. त्यामुळे या तपासाबाबत नेहमीच साशंकता व्यक्त केली जात आहे. पोलिसांच्या तपासाबाबत आणि वरिष्ठांच्या दुर्लक्ष बाबत ठेवीदार यांनी तीव्र नाराजी व्यक्त केली आहे.
तर आत्मक्लेष व आत्मदहन आंदोलन…
जोपर्यंत आरोपी भाऊसाहेब कुटे व त्यांचे कुटूंबीय, चेतन नागराजबाबा कपाटे उर्फ सुदर्शन महाराज, कृष्णराव कदम व त्यांचे कुटूंबिय, संदिप दगडू जरे यांच्यासह उर्वरित आरोपींना अटक होत नाही, कर्जदार व जामीनदार यांच्या मालमत्ता जप्त होत नाहीत. तोपर्यंत आंदोलन बेमुदत चालूच राहिल. ठेवीदारांना योग्य न्याय न मिळाल्यास आत्मक्लेष आंदोलन व आत्मदहन करण्यात येईल असा इशारा दुधगंगा ठेवीदार संघर्ष समितीने दिला आहे.
