महाराष्ट्र संवाद न्यूज
संगमनेर : सकल मराठा समाजाच्या आरक्षणासाठी मनोज जरांगे पाटील यांच्या सुरू असलेल्या उपोषणाला पाठिंबा देण्यासाठी संगमनेर बस स्थानकाच्या प्रवेशद्वारावरील साखळी उपोषणाला संगमनेर मधील जिजाऊ ब्रिगेडच्या महिलांनी उपोषणस्थळी उपस्थित राहत पाठिंबा दर्शविला आहे.
“जय जिजाऊ जय शिवराय”, “मराठा आरक्षण आमच्या हक्काचे”, या घोषणांनी उपोषण स्थळ दुमदुमले होते. जिजाऊ ब्रिगेडच्या अध्यक्ष डॉ. दिपाली पानसरे, डॉ. श्रद्धा वाणी, ॲड. सीमा काळे-सातपुते, माधुरी शेवाळे, वृषाली कडलग, स्नेहलता कडलग, वनिता कर्पे, नम्रता दिघे, सुधा नवले, सुदेशना वाणी, वृषाली साबळे, कस्तुरी शेवाळे आदींसह महिला यावेळी उपस्थित होत्या. वाणी यांनी संभाजी ब्रिगेडचा आरक्षणासाठीच्या आंदोलनाला पाठिंबा असल्याचे सांगितले.
ॲड. सीमा काळे-सातपुते म्हणाल्या, मराठा आरक्षण आमच्या हक्काच्या असून ते मिळालेच पाहिजे. मनोज जरांगे पाटील यांनी सुरू केलेल्या व त्यांच्या समर्थनार्थ संगमनेरमध्ये सुरू असलेल्या साखळी उपोषणाला जिजाऊ ब्रिगेडचा पाठिंबा आहे. शिवरायांनी स्थापन केलेल्या मराठ्यांच्या स्वराज्यामध्ये मराठ्यांना आज आरक्षणासाठी, आपल्या हक्कासाठी लढा करावा लागतोय हे दुर्दैव आहे.
सरकारमध्ये निम्म्यापेक्षा अधिक मराठा लोकप्रतिनिधी असताना देखील एकही लोकप्रतिनिधी मराठ्यांच्या आरक्षणासाठी बोलण्यास तयार नाही, याची मराठ्यांनी गंभीरपणे दखल घेणे आवश्यक आहे. आरक्षणाच्या लढ्यासाठी सुरू असलेले उपोषण तसेच आंदोलने शांततामय मार्गाने सुरू ठेवण्याचे आवाहन यावेळी त्यांनी केले.
