महाराष्ट्र संवाद न्यूज
भारतीय जनता पक्षाचे प्रदेशाध्यक्ष चंद्रशेखर बावनकुळे मंगळवारी 28 नोव्हेंबर संगमनेर आणि राहाता येथे शिर्डी लोकसभा मतदारसंघाच्या सहा तालुक्यातील युवा वॉरियर्सशी संवाद साधून संघटनात्मक कार्याचा आढावा घेणार आहे, अशी माहिती भाजपचे जिल्हाध्यक्ष विठ्ठलराव लंघे यांनी दिली.
पाच राज्यांच्या निवडणुकांचे निकाल तोंडावर असतानाच भारतीय जनता पक्षाने लोकसभा निवडणुकीची तयारी सुरू केली आहे. या पार्श्वभूमीवर पक्षाचे प्रदेशाध्यक्ष चंद्रशेखर बावनकुळे शिर्डी लोकसभा मतदारसंघाचा मंगळवारी आढावा घेणार आहे.
लोकसभा प्रवास योजनेच्या माध्यमातून प्रदेशाध्यक्ष बावनकुळे राज्यातील मतदारसंघाचा दौरा करत आहे. या दौऱ्याअंतर्गत संगमनेर आणि राहाता येथे संघटनात्मक कार्याचा आढावा घेण्यासाठी बैठकीचे आयोजन करण्यात आले आहे.
बावनकुळे यांचे सकाळी शिर्डी विमानतळावर आगमन झाल्यानंतर संगमनेरमध्ये ‘संपर्क से समर्थन’ अभियानातून विविध योजनांचे लाभार्थी नागरीक यांच्याशी थेट रॅलीच्या माध्यमातून संवाद साधणार आहेत. मालपाणी लाॅन्स येथे संगमनेर अकोले आणि कोपरगाव तालुक्यातील प्रत्येकी शंभर युवा वाॅरिययर्सशी संवाद साधून ते संघटनात्मक कामाचा आढावा घेतील.
त्यानंतर दुपारी तीन वाजता राहाता येथे राहाता नेवासा आणि श्रीरामपुर तालुक्यातील युवा वाॅरियर्ससोबत त्यांचा संवाद कार्यक्रम आयोजित करण्यात आला असून लोकसभा कोअर कमिटीची महत्वपूर्ण बैठकदेखील शिर्डीत सहभागी होणार आहे. यावेळी बावनकुळे यांच्या समवेत पालकमंत्री राधाकृष्ण विखे पाटील, बाळा भेगडे यांच्यासह राज्य व जिल्ह्यातील भाजपाचे पदाधिकारी उपस्थित राहतील.
