महाराष्ट्र संवाद न्यूज
संगमनेर : संगमनेर नगरपालिका हद्दीतील संजय गांधी नगर वडारवस्ती येथील झोपडपट्टी धारकांना घरपट्टी लागू करून त्यांना हक्काचा असेसमेंट उतारा मिळावा, याकरता काँग्रेस विधिमंडळ पक्षाचे नेते आमदार बाळासाहेब थोरात, आमदार सत्यजित तांबे यांच्यासह शिवसेना नेते अमर कतारी यांनी सातत्याने पाठपुरावा केला असून यामुळे सर्व नागरिकांना हक्काचा उतारा मिळणार असल्याची माहिती माजी नगराध्यक्ष दुर्गाताई तांबे यांनी दिली आहे.
तांबे म्हणाल्या की, संजय गांधी नगर वडार वस्ती येथील झोपडपट्टी धारकांना घरपट्टी लागू करून त्यांना उतारा द्यावा, याकरता शिवसेनेचे तत्कालीन शहराध्यक्ष अमर कतारी यांनी सातत्याने पाठपुरावा केला. याबाबत त्यांनी नगरपालीकेकडे वेळोवेळी मागणी करून वेळप्रसंगी आंदोलनही केली.
या मागणीचा विचार करून काँग्रेस पक्षाचे नेते आमदार बाळासाहेब थोरात यांनीही या नागरिकांच्या उताऱ्यासाठी प्रयत्न केले. याबरोबर विधानपरिषद सदस्य आमदार सत्यजित तांबे यांनीदेखील पंधरा दिवसापूर्वी या प्रलंबित मागणी संदर्भात शासनाच्या अधिकाऱ्यांसमवेत तसेच मुख्याधिकारी राहुल वाघ यांच्या समवेत आढावा बैठक घेतली.
यासाठी शासन दरबारी सातत्याने पाठपुरावा केल्याने या नागरिकांना घरपट्टी तसेच असेसमेंट उतारा मिळत आहे. म्हाडाच्या अधिकाऱ्यांसमोर पुनर्वसनाबाबत देखील चर्चा करून मंजुरी मिळाली आहे.
हक्काचे घर उतारा मिळवून देण्यासाठी सातत्याने पाठपुरावा केल्याबद्दल काँग्रेस विधिमंडळ पक्षाचे नेते आमदार बाळासाहेब थोरात, आमदार सत्यजित तांबे, नगराध्यक्ष दुर्गाताई तांबे व शिवसेनेचे तत्कालीन शहराध्यक्ष अमर कतारी यांचे संजय गांधी नगर परिसरातील नागरिकांकडून विशेष अभिनंदन होत आहे.
स्थानिक नागरिकांचा पाठपुरावा व शिवसेना शहराध्यक्ष अमर कतारी यांनी केलेले प्रयत्न यामुळे संजय गांधी नगरमधील घर धारकांना हक्काचा उतारा मिळणार असल्याने या नागरिकांच्या जीवनामध्ये एक आनंदाचा दिवस निर्माण झाला आहे.
