महाराष्ट्र संवाद न्यूज
अहमदनगर – माजी खासदार भाऊसाहेब वाकचौरे यांच्या शिवसेना (उद्धव बाळासाहेब ठाकरे) प्रवेशानंतर उत्तर नगर जिल्ह्यात झालेल्या राजकीय फेरबदलामुळे शिवसेनेत मोठी अस्वस्थता आहे. पक्षांतर्गत राजकारणाला कंटाळून शिवसेनेचे माजी अकोले तालुकाप्रमुख डॉ. मनोज मोरे यांनी अजित पवारांची साथ धरली आहे.
ऐन निवडणुकीच्या तोंडावर शिवसेना काँग्रेस भाजप असा प्रवास करत पुन्हा शिवसेनेत स्वगृही परतलेल्या माजी खासदार भाऊसाहेब वाकचौरे यांच्या प्रवेशानंतर शिवसेना पदाधिकारी आणि कार्यकर्त्यांमध्ये नाराजी असतानाच त्या पाठोपाठ पक्षप्रमुखांनी जिल्ह्याच्या कार्यकारिणीत मोठे फेरबदल करत रावसाहेब खेवरे यांच्याकडे जिल्हाप्रमुख पदाची धुरा सोपविली. त्यापाठोपाठ वाकचौरे आणि खेवरे यांच्यावरची सुप्त नाराजी आता समोर येऊ लागली आहे.
नव्या पदाधिकारी निवडीनंतर मध्यंतरी नाराज असलेल्या निष्ठावंत माजी पदाधिकारी आणि शिवसैनिकांनी संगमनेरमध्ये उत्तर नगर जिल्ह्यातील निष्ठावंतांचा मेळावा आयोजित केला होता. मात्र ऐनवेळी पक्षांतर्गत सूत्रे फिरली आणि मेळावा घेणाऱ्यांना आपला निर्णय पुढे ढकलावा लागला. मात्र नाराजांची समजूत काढण्यात पक्षश्रेष्ठी अयशस्वी ठरत असल्याचे आता दिसत आहे. याचीच परिणती म्हणून मोरे यांनी आता राज्याचे उपमुख्यमंत्री अजित पवार यांच्या देवगिरी बंगल्यावर आपल्या कार्यकर्त्यांसह राष्ट्रवादीत प्रवेश केला आहे.
पवार यांच्या उपस्थितीत राष्ट्रवादी पवार गटाचे प्रदेशाध्यक्ष सुनील तटकरे यांनी मोरे यांचे पक्षात स्वागत केले यावेळी अकोल्याचे आमदार किरण लहामटे उपस्थित होते. मोरे यांच्या प्रवेशानंतर शिवसेनेच्या ठाकरे गोटात खळबळ उडाली असून उत्तर नगर जिल्ह्यातील अन्य नाराज पदाधिकारी आता काय भूमिका घेतात याकडे लक्ष लागले आहे.
डॉ. मोरे यांना शिवसेनेचे तालुकाप्रमुख म्हणून संधी मिळाल्यानंतर त्यांनी अकोले तालुक्यामध्ये शिवसेनेची मोठी बांधणी केली होती. गावागावात शिवसेनेच्या शाखा निर्माण केल्या. कृषी उत्पन्न बाजार समितीमध्ये त्यांच्या नेतृत्वाखाली दोन सदस्य निवडून गेले. खरेदी विक्री संघातही दोन जागांवर यश मिळाले, एवढेच नव्हे तर तेथे उपाध्यक्षपदही पदरी पाडून घेण्यात यशस्वी झाले. काम करणारा पदाधिकारी दुरावल्याने शिवसेनेची या भागात हानी झाली आहे. मोरे यांनी पत्रकार परिषद घेत आपली भूमिका स्पष्ट केली. यात त्यांनी पक्ष सोडण्याचे कारण स्पष्ट केले नसले तरी उपमुख्यमंत्री अजित पवार आणि आमदार डॉ. किरण लहामटे यांच्या नेतृत्वाखाली काम करणार असल्याचे सांगितले.
