संगमनेर – हिंदवी स्वराज्याचे संस्थापक अखंड हिंदुस्तानचे आराध्य दैवत छत्रपती शिवाजी महाराजांची जयंती संगमनेर नगर परिषदेच्यावतीने सालाबाद प्रमाणे, शासनाने दिलेल्या निर्देशानुसार उत्साहात साजरी करण्यात आली. नगरपालिका रांजणातून छत्रपती शिवाजी महाराजांच्या पुतळ्यापर्यंत काढण्यात आलेल्या मिरवणुकीत संगमनेरमधील विविध विभागांच्या शासकीय अधिकाऱ्यांसह नगरपरिषदेच्या शाळांमधील विद्यार्थी, शिक्षक, पालिकेतील कर्मचारी अधिकारी सहभागी झाले होते.
प्रारंभी नगरपरिषद प्रांगणात उभारण्यात आलेल्या व्यासपीठावर छत्रपती शिवाजी महाराजांच्या प्रतिमेचे पूजन मान्यवरांच्या हस्ते करण्यात आले. यावेळी संगमनेरचे प्रांत अधिकारी शैलेश हिंगे, पोलीस उपाधीक्षक सोमनाथ वाघचौरे, तहसीलदार धीरज मांजरे, पंचायत समितीचे गट विकास अधिकारी अनिल नागणे, शहर पोलीस स्टेशनचे पोलीस निरीक्षक भगवान मथुरे, नगरपरिषदेचे मुख्याधिकारी तथा प्रशासक राहुल वाघ, उपमुख्याधिकारी संजय पेखळे, कर निर्धारण प्रशासकीय अधिकारी प्रल्हाद देवरे, कार्यालय निरीक्षक राजेश गुंजाळ, कृषी उत्पन्न बाजार समितीचे सचिव सतीश गुंजाळ आदी मान्यवर उपस्थित होते.
छत्रपती शिवाजी महाराजांच्या राज्याभिषेक सोहळ्याला साडेतीनशे वर्षांचा कालावधी उरला आहे. या पार्श्वभूमीवर शासनाने राज्याभिषेक सोहळ्याचे मानचिन्ह वापरण्याचे निर्देश शासकीय कार्यालयांना दिले आहे. या निर्देशानुसार संगमनेर नगर परिषदेच्या रामकृष्ण सभागृहात छत्रपती शिवाजी महाराजांच्या राज्याभिषेक सोहळ्याच्या तैलचित्राचे अनावरण प्रदीर्घ सेवेनंतर निवृत्त होत असलेले नगरपरिषदेचे जमादार संजय देशमुख यांच्या हस्ते करण्यात आले.
संगमनेर नगर परिषदेच्या रघुनाथ शिवजीराम करवा व स्वातंत्र्यवीर वि. दा. सावरकर येथे विद्यार्थ्यांसाठी असलेल्या अभ्यासिकेतील विद्यार्थ्यांनी एमपीएससी व यूपीएससी या परीक्षेत विशेष प्राविण्य मिळवून शासनाच्या विविध क्षेत्रातील कार्यालयात अधिकारी पदावर कार्यरत झाल्याबद्दल अशा विद्यार्थ्यांचा उपस्थित मान्यवरांच्या हस्ते सन्मान करण्यात आला.
सह्याद्री विद्यालयातील शिक्षक विद्यार्थी यांनी एकत्रित महाराष्ट्र राज्य गीताचा दर्जा असलेल्या महाराष्ट्र माझा गीताचे गायन केले. यानंतर उपस्थित मान्यवरांच्या हस्ते श्रीफळ वाढवून नगरपरिषदेचा प्रांगणातून मिरवणुकीस प्रारंभ करण्यात आला.
नगरपरिषदेच्या प्रांगणातून ढोल ताशांच्या गजरात निघालेली शिवरायांची मिरवणूक शहरातील बाजारपेठ, तेली खुंट, सय्यद बाबा चौक, मेनरोड, अशोक चौक या मार्गाने छत्रपती शिवरायांच्या पुतळ्यापाशी आली. तेथे उपस्थित मान्यवरांच्या हस्ते पुष्पहार अर्पण करून मिरवणुकीची सांगता झाली. छत्रपती शिवाजी महाराज, जिजाऊ यांच्या वेशभूषा केलेल्या विद्यार्थ्यांचा मान्यवर अधिकाऱ्यांसमवेत या मिरवणुकीत समावेश होता.
