झेनॉन गाडीला भगवा ध्वज लावून सुरू होती वाळूतस्करी; पिंपरणे-जोर्वे रस्त्यावर तालुका पोलिसांची कारवाई

संगमनेर, दि. २६
राज्यातील वाळू तस्करीला लगाम लावण्यासाठी महसूल तथा जिल्ह्याचे पालकमंत्री राधाकृष्ण विखे पाटील सातत्याने प्रयत्न करत आहे. यासाठी त्यांनी नवे वाळू धोरण देखील आणले, मात्र वाळू तस्करांकडून बेकायदा वाळू उपसा सुरूच आहे. संगमनेर तालुका पोलिसांनी केलेल्या कारवाईत एका झेनॉन गाडीला भगवा ध्वज लावून वाळू तस्करी सुरू असल्याचे समोर आले.
नगर एलसीबीने दोन दिवसांपूर्वीच संगमनेर मधील वाळू तस्करांवर कारवाई केली, याला काही तासांचा अवधी उलटत नाही तोच तालुका पोलिसांनी महसूलमंत्र्यांच्याच मतदारसंघातील पिंपरणे-जोर्वे रस्त्यावर केलेली कारवाई समोर आली आहे.
सोमवारी मध्यरात्री ही कारवाई करण्यात आली असून संगमनेर तालुका पोलिसांकडून मिळालेली माहिती अशी, टाटा कंपनीच्या एम. एच. ४२ बी ४०२६ या पांढऱ्या रंगाच्या झेनॉन २०७ मधून पिंपरणे-जोर्वे रस्त्यावर वाळूची बेकायदा वाहतूक केली जात असल्याचे लक्षात आल्यानंतर पोलिसांनी या गाडीवर कारवाई केली. कारवाईदरम्यान चालक-मालक पळून जाण्यात यशस्वी झाले असून अद्याप त्यांचे नाव निष्पन्न झाले नाही.अर्धा ब्रास वाळूने भरलेली ही गाडी तालुका पोलिसांनी ताब्यात घेतली असून या कारवाईत गाडीसह सुमारे एक लाख पाच हजार रुपये किमतीचा मुद्देमाल पोलिसांनी जप्त केला आहे. पोलीस निरीक्षक देविदास ढुमणे यांच्या मार्गदर्शनाखाली पोलीस हेडकॉन्स्टेबल डी. जी. दिघे पुढील तपास करत आहे.