संगमनेर, दि. २८
नगर एलसीबी आणि तालुका पोलिसांनी केलेल्या वाळू तस्करीच्या कारवाईनंतर संगमनेरचे तहसीलदार धीरज मांजरे ॲक्शन मोडवर आले आहे. संगमनेर खुर्द येथून अवैध वाळू उपसा करणाऱ्या आठ जणांना तुमच्यावर कारवाई का करू नये, अशा आशयाच्या नोटिसा बजावल्या आहे. याशिवाय महसूलची हेरगिरी करणाऱ्या आणि वाळू तस्करीला मदत करणाऱ्यांना देखील कारवाईच्या नोटिसा बजावण्याचा निर्णय त्यांनी घेतला आहे.
राज्याचे महसूल आणि जिल्ह्याचे पालकमंत्री राधाकृष्ण विखे पाटील यांनी संगमनेरसह राज्यातील विविध राजकीय पक्षाच्या पदाधिकाऱ्यांसह वाळू तस्करांकडून सुरू असलेल्या बेकायदा वाळू तस्करीकडे विशेष लक्ष केंद्रित केले आहे. त्यासाठी त्यांनी नवे वाळू धोरण देखील आणले असून त्याची राज्यात अंमलबजावणी सुरू आहे. असे असले तरी या धोरणाची सर्रासपणे पायमल्ली करत विविध ठिकाणी वाळू तस्करी जोरात सुरू आहे. विशेष म्हणजे यात सत्ताधारी आणि विरोधी पक्षातील राजकीय कार्यकर्त्यांचा समावेश असल्याचे देखील समोर आले आहे.
नगर एलसीबीच्या पथकाने तालुक्यातील खांडगाव शिवारात केलेल्या अवैध वाळू वाहतुकीवरील छापेमारीत सत्ताधारी पक्षातीलच राजकीय कार्यकर्ते, पदाधिकारी आढळून आले. याशिवाय तालुक्यातील महसूलमंत्र्यांच्या मतदार संघात भगवा ध्वज लावून सुरू असलेली वाळू तस्करी पोलिसांनी समोर आणली. यातील आरोपी अद्याप निष्पन्न झालेले नाही.
या पार्श्वभूमीवर तहसीलदार धीरज मांजरे ॲक्शन मोडवर आले असून त्यांनी संगमनेर खुर्द परिसरात वाळू उपसा करणाऱ्या आठ जणांना कामगार तलाठी यांच्या अहवालावरून आपल्यावर दंडात्मक कारवाई का करू नये असे विचारणा करत त्यांना दोन दिवसात खुलासा सादर करण्यास सांगितले आहे. तहसीलदारांनी बजावलेल्या या नोटिसांमुळे बेकायदा वाळू उपसा करणाऱ्या वाळू तस्करांमध्ये खळबळ उडाली आहे.
पाटीलमळा येथील प्रसाद गुंजाळ यांच्या शेतातून रात्रीच्यावेळी आणि साई अमृत पेट्रोल पंपाजवळील रस्त्याने रात्रीच्यावेळी समीर शेख, अझहर खान, संजय वाकचौरे, धनंजय गोसावी, हर्षल शेजूळ, लक्ष्मण गोसावी, अभिजीत शिंदे, प्रसाद गुंजाळ हे अनधिकृतपणे वाळू उपसा करून वाहतूक करत असल्याचा अहवाल कामगार तलाठी यांनी तहसीलदारांना सादर केला होता. त्याची दखल घेऊन तहसीलदार मांजरे यांनी आपल्यावर दंडात्मक कारवाई का करू नये? अशी विचारणा ’करत दोन दिवसांत खुलासा सादर करण्यास सांगितले आहे. जर मुदतीत खुलासा सादर केला नाही तर दंडात्मक कारवाईचा इशारा दिला आहे.
संशयास्पदरित्या रात्रीच्यावेळी नदीकाठी वाळू चोरी अथवा महसूल पथकावर गस्त ठेवणारे लोक आढळून येतील अशा लोकांवर देखील सीआरपीसी १०९ प्रमाणे कारवाई करण्यात येणार असून वाळू चोरी करणार्‍या, वाळूची वाहतूक करणाऱ्यांची माहिती घेऊन त्यांनादेखील नोटिसा पाठविला जाणार असल्याचे तहसीलदार मांजरे यांनी सांगितले.
