शनिवार दि. २३ मार्च, संगमनेर
तालुक्यातून जाणाऱ्या कोल्हार घोटी मार्गावर समनापुर लागत असलेल्या हॉटेल नेचर जवळील मैदानात २३ वर्षीय तरुणाचा गळा कापून खून केल्याचा प्रकार समोर आला आहे. संगमनेरमध्ये गेल्या काही दिवसात घडलेल्या घटनांमुळे तणावपूर्ण परिस्थिती असताना पोलीस अधिकाऱ्यांनी सतर्कता दाखवत अवघ्या तीन तासात या खून प्रकरणाचा उलगडा केला. या संदर्भात दोघा संशयितांना ताब्यात घेण्यात आले असून कौटुंबिक कारणातून खून झाल्याची प्राथमिक माहिती पुढे येत आहे.
शनिवारी सकाळी हॉटेल नेचर जवळील मैदानात खून झालेल्या अवस्थेत एका तरुणाचा मृतदेह पडलेला असल्याची माहिती पोलिसांना मिळाली होती. संगमनेरचे पोलीस उपाधीक्षक सोमनाथ वाघचौरे, पोलीस निरीक्षक भगवान मथुरे, सहाय्यक निरीक्षक विश्वास भान्सी यांच्यासह पोलीस पथकाने ताबडतोब घटनास्थळी धाव घेतली. अवघ्या काही मिनिटातच या तरुणाची ओळख पटवत पोलिसांनी पुढील तपासाला सुरुवात केली.
अब्दुल उर्फ अतुल शोभाचंद सावंत असे खून झालेल्या तरुणाचे नाव असून या घटनेमुळे संगमनेरात निर्माण झालेल्या विविध चर्चांमुळे पुन्हा एकदा तणावाचे वातावरण निर्माण झाले होते. पोलीस यंत्रणेने बारकाईने तपास करत परिसरातील काही ठिकाणच्या सीसीटीव्ही फुटेजची तपासणी केली असता खून झालेल्या तरुणांसोबत आणखी काहीजण असल्याचे निष्पन्न झाले. घटनास्थळापासून जवळच काही अंतरावर पोलिसांना दारूच्या बाटल्या, चाकू, काडेपेटी, चपला आढळून आल्या. त्याच्या सोबतच्या तरुणांची नावे निष्पन्न करत पोलिसांनी त्यांच्या मागावर उपनिरीक्षक रमेश पवार, सहाय्यक फौजदार रावसाहेब लोखंडे, पोलीस कॉन्स्टेबल राहुल सारबंदे, राहुल डोके, साईनाथ पवार, विशाल करपे यांच्यासह सहाय्यक पोलीस निरीक्षक विश्वास भान्सी, आत्माराम पवार, हरिश्चंद्र बांडे, अजित कुऱ्हे आदींचा समावेश असलेले दोन तपास पथके आरोपीच्या मार्गावर पाठविली.
पोलीस पथकांनी काही वेळातच संशयित आरोपी सागर रमेश मुळेकर आणि राजेश मनोज मकवाणी या दोघांना ताब्यात घेतले. पोलीस चौकशीत या दोघांनी त्यांचा मित्र अब्दुल उर्फ अतुल शोभाचंद सावंत याचा कौटुंबिक कारणातून शुक्रवारी रात्री दारू पाजून खून केल्याची प्राथमिक माहिती समोर आली आहे. शहर पोलीस ठाण्यात आरोपीं विरोधात खूनाचा गुन्हा दाखल करण्याची प्रक्रिया सुरू होती.
