शुक्रवार दि. २९ मार्च, संगमनेर
गुटक्याच्या अनुषंगाने प्रकाशित झालेल्या बातम्यांवर समाज माध्यमातून कमेंट करणाऱ्या शिवसेनेच्या दीपक साळुंखे यांना बंदी असलेल्या गुटख्याची सर्रासपणे शहरात विक्री करणाऱ्या व्यक्तीने जीवे मारण्याची धमकी देण्याचा प्रकार समोर आला. या संदर्भात विजय भागवत याच्याविरुद्ध शहर पोलीस ठाण्यात गुन्हा दाखल करण्यात आला आहे.
स्थानिक दैनिकात गुटखा तस्करांकडून संगमनेरात राजरोसपणे गुटख्याची विक्री केली जाते. बंदी असलेला गुटखा संगमनेरात कोणत्याही पानटपरीवर सर्रासपणे मिळतो. पोलीस देखील अशा किरकोळ विक्रेत्यांवर वारंवार कारवाई करतात मात्र या सर्व प्रकारांमधील प्रमुख गुटका किंग असलेले विक्रेते पोलिसांना सापडत नाही किंवा जाणीवपूर्वक त्यांच्यावर कारवाई केली जात नाही. या गुटक्यावर नियंत्रण ठेवणारे अन्न औषध प्रशासन नावाचे खाते अस्तित्वात आहे की नाही अशी शंका येण्याइतपत या खात्याचे काम सुरू असते. त्यामुळेच पोलीस आपल्या खिशात असल्याचे सांगत गुटका किंग म्हणून मिरवले जाणारे व्यावसायिक सर्रासपणे शहरातील छोट्या छोट्या विक्रेत्यांना गुटख्याची विक्री करत असतात.
या संदर्भात स्थानिक माध्यमातून बातम्या प्रसिद्ध होत असतात. या बातम्यांची कात्रणे समाज माध्यमातून फिरतात. त्यामुळे समाजातील लोक अशा प्रकारच्या बातम्यांवर आपल्या प्रतिक्रिया व्यक्त करतात. अशाच पद्धतीने संगमनेर अकोले तालुक्यात कार्यरत असलेल्या गुटखा किंग बद्दल स्थानिक ‘साय दैनिक प्रवरातीर’ मधून प्रसिद्ध झालेल्या बातम्यांवर शिवसेनेचे दीपक साळुंखे यांनी प्रतिक्रिया व्यक्त केल्याचा राग आल्याने विजय भागवत याने साळुंखे यांना जीवे ठार मारण्याची धमकी दिली.
मंगळवारी (२६ मार्च) शहरातील गणेश नगर भागात हा प्रकार घडला. साळुंके गणेश नगर मधील आपल्या नातेवाईकांकडे गेले असता तेथे आलेल्या विजय भागवत याने वृत्तपत्रात आलेल्या बातम्यांवर तुम्ही कमेंट का करता अशी विचारणा करत तुम्ही आमच्याकडे हप्ते मागतात असा खोटा आरोप केला. तसेच साळुंखे यांना शिवीगाळ करत जीवे ठार मारण्याची धमकी दिली. अशा आशयाची फिर्याद साळुंखे यांनी शहर पोलीस ठाण्यात दिले असून विजय भागवत यांच्याविरुद्ध अदखलपात्र गुन्ह्याची नोंद करण्यात आली आहे.
दरम्यान विजय भागवत याच्याविरुद्ध प्रसिद्ध झालेल्या बातम्यांमुळे त्याने संबंधित दैनिक ‘प्रवरातीर’च्या संपादकांनाही धमकावण्याचा प्रकार यापूर्वी घडला होता. राजरोसपणे शहरात अवैधरीत्या गुटखा विक्री करता यावी यासाठी विजय भागवत हा माध्यमांवर दबाव निर्माण करण्याचा प्रयत्न करून पोलीस आपले काहीच करू शकत नसल्याचे सांगतो. त्यामुळे संबंधित यंत्रणेने या प्रकाराची तातडीने दखल घेणे आवश्यक आहे.
