रविवार दि. ३१ मार्च
नगरमधील राष्ट्रवादी काँग्रेस शरद पवार गटाचे उमेदवार निलेश लंके यांनी उमेदवारी मिळताच मध्यरात्री संगमनेर गाठीत काँग्रेस नेते आमदार बाळासाहेब थोरात यांची भेट घेतली. दीड तासाच्या या भेटीत लंके यांनी थोरात यांच्याशी लोकसभा निवडणुकीच्या पार्श्वभूमीवर चर्चा केली. ज्येष्ठ नेते बाळासाहेब थोरात यांच्याकडून विजयाचा कानमंत्र घेत ते मतदार संघात परतले.
राज्यातील महत्त्वाच्या लढतीमध्ये अहमदनगर दक्षिण लोकसभा मतदार संघाचा समावेश आहे. महाविकास आघाडीच्या जागा वाटपात ही जागा राष्ट्रवादी काँग्रेस (शरद पवार) गटाला गेली आहे. शरद पवारांनी राष्ट्रवादी काँग्रेस (अजित पवार) गटातील आमदार निलेश लंके यांना येथून उमेदवारी दिली. त्यासाठी दोनच दिवसांपूर्वी डंके यांनी आपल्या आमदारकीचा राजीनामा दिला होता.
निलेश लंके यांना उमेदवारी जाहीर केल्यानंतर नगर दक्षिण मधील लढत स्पष्ट झाली आहे. तर भाजपाने विद्यमान आमदार डॉ. सुजय विखे यांना पुन्हा उमेदवारी दिली आहे. विखे व लंके यांच्यात या मतदारसंघात निकराची लढाई होत आहे. धनशक्ती विरुद्ध जनशक्ती असे या निवडणुकीला स्वरूप आले आहे. या पार्श्वभूमीवर लंके यांनी संगमनेरमध्ये महाविकास आघाडीतील प्रमुख नेते थोरात यांच्या ‘सुदर्शन’ निवासस्थानी शनिवारी मध्यरात्री त्यांची भेट घेत चर्चा केली. यावेळी काँग्रेसच्या तालुकाध्यक्ष कॅन्सर तज्ञ डॉ. जयश्री थोरात, पारनेरचे राहुल झावरे उपस्थित होते.
