शुक्रवार दि. ५ एप्रिल, अहमदनगर
लोकसभा निवडणुकीच्या पार्श्वभूमीवर नगरच्या स्थानिक गुन्हे शाखेने (LCB) छापा टाकून पकडलेला ७३ लाख २४ हजार ५०० रुपयांपैकी ६९ लाख ४४ हजार ५०० रुपयांच्या रकमेचे योग्य स्पष्टीकरण न मिळाल्याने ही रक्कम आयकर विभागाकडे हस्तांतरित करण्यात आली असल्याची माहिती मुख्य लेखा वित्त अधिकारी तथा खर्च सनियंत्रण कक्षाचे नोडल अधिकारी यांच्याकडून देण्यात आली आहे.
आयकर विभागाने प्राधिकृत केलेल्या अधिकाऱ्याकडे ही रक्कम सोपविण्यात आली तर उर्वरित ३ लाख ८० हजार रुपयांसंदर्भात योग्य स्पष्टीकरण मिळाल्याने हे रक्कम बोल्हेगाव (नगर) येथील संबंधित व्यक्ती विजय कृष्णा भगत यांना सोपविण्यात आली आहे.
लोकसभा निवडणुकीच्या पार्श्वभूमीवर जिल्ह्यात आदर्श आचारसंहिता लागू आहे. यादरम्यान नगरच्या स्थानिक गुन्हे शाखेला या रकमे संदर्भात गोपनीय माहिती मिळाली होती. मिळालेल्या माहितीच्या आधारे स्थानिक गुन्हे शाखेच्या पथकाने २१ मार्चला छापा टाकून ७३ लाख २४ हजार ५०० रुपयांची रोकड पकडली होती. जप्त करण्यात आलेल्या या रकमे संदर्भात जिल्हा तक्रार निवारण समितीने आयकर विभागाला चौकशी करून अहवाल सादर करण्याच्या सूचना दिल्या होत्या.
त्यानंतर आयकर विभागाने दिलेल्या अहवालानुसार हे कारवाई करण्यात आल्याचे सांगण्यात आले आहे. लोकसभा निवडणुकीच्या पार्श्वभूमीवर नगर दक्षिण मतदार संघात मोठ्या प्रमाणात आर्थिक व्यवहार होण्याची शक्यता आहे. येथील लढतीला श्रीमंत विरुद्ध गरीब अशी पार्श्वभूमी लाभल्याने या मतदारसंघात प्रशासन सतर्क झाले आहे.
