मंगळवार दि. ९ एप्रिल
जवळ हत्यार बाळगल्याच्या कारणावरून पोलिसांनी दोघाजणांना पकडले. हत्यारे कुठून, कशी आली याची पोलिसांनी चौकशी सुरू केली आणि या चौकशीतून वेगळाच उलगडा झाला. प्रेम संबंधात अडथळा ठरत असलेल्या प्रेयसीच्या पतीचा तीन वर्षांपूर्वी खून करून फरार असलेले आरोपी पोलिसांच्या हाती सापडले.
वसईच्या पेल्हार पोलिसांनी ३ एप्रिलला बेकायदा हत्यारे बाळगल्याप्रकरणी पोखरण परण साव (वय ५० वर्ष, रा. नालासोपारा) व अब्दुल मुबारकअली शहा उर्फ बड्डा (वय २३ वर्ष) या दोघा रिक्षा चालकांना अटक केली होती. त्यांच्याकडे सुरू असलेल्या चौकशीत धक्कादायक बाब समोर आली आणि तपासात या दोघांनी तीन वर्षांपूर्वी केलेल्या हत्येचा उलगडा झाला.
पोखन साव याचे नायगाव येथे राहणार्या महिलेशी प्रेमसंबंध होते. या प्रेमात तिचा पती वकिल अहमद इद्दीसी अडथळा ठरत होता. त्याचा काटा काढण्यासाठी साव याने अब्दुल शाह आणि इम्रान सिध्दीकी या साथिदारांसह त्याच्या हत्येचा कट रचला होता. ३ सप्टेंबर २०२१ रोजी रात्री साडेआठ वाजता या तिघांनी मुंबई-अहमदाबाद हायवेवरील बाफाणे गावच्या हद्दीत वकील इद्दीसी याचे अपहरण केले.
रिक्षातच त्याची हत्या करून मृतदेह हायवेवरील भालीवली गावच्या हद्दीत खड्ड्यात फेकून दिला होता. याप्रकरणी विरार पोलीस ठाण्यात खुनाचा गुन्हा दाखल करण्यात आला होता. मात्र, मारेकरी पोलिसांच्या हाती लागत नव्हते.
हत्यारे बाळगल्याप्रकरणी पोलिसांनी या दोघांना ताब्यात घेतल्यानंतर चौकशीत या गुन्ह्याचा उलगडा झाला. पेल्हार पोलिसांनी त्यांचा तिसरा साथीदार इम्रान सिध्दीकी यालाही अटक केली आहे. धक्कादायक बाब म्हणजे पोखन सावने आपल्या प्रेयसीच्या आणखी एका प्रियकराचाही काटा काढण्याचा प्रयत्न केला होता. पण, त्यात तो यशस्वी होऊ शकला नव्हता.
