बुधवार, दि. १० एप्रिल –
अहमदनगर जिल्ह्यासह राज्यभरात बहुचर्चित ठरलेल्या संपदा नागरी सहकारी पतसंस्थेच्या १३ कोटी ३८ लाख रुपयांच्या गैरव्यवहार प्रकरणात आरोप सिद्ध झाल्याने जिल्हा व सत्र न्यायालयाने वाफारे पती-पत्नीसह पाच जणांना जन्मठेपेची शिक्षा ठोठावली आहे. तर अन्य बारा जणांना वेगवेगळ्या कलमाखाली पाच ते दहा वर्षांची शिक्षा सुनावली आहे.
जिल्हा व सत्र न्यायाधीश आर. एन. नाईकवाडी यांनी बुधवारी दोषी ठरलेल्या आरोपींना शिक्षा ठोठावली. तत्कालीन संस्थापक चेअरमन ज्ञानदेव सबाजी वाफारे याच्यासह त्याची पत्नी सुजाता ज्ञानदेव वाफारे, रवींद्र विश्वनाथ शिंदे, संजय चंपालाल बोरा व साहेबराव रामचंद्र उर्फ बाळासाहेब भालेकर यांचा जन्मठेप झालेल्या गुन्हेगारात समावेश आहे. तर उर्वरित बारा संचालक गुन्हेगारांना न्यायालयाने पाच ते दहा वर्षाची शिक्षा सुनावली आहे.
सुधाकर परशुराम थोरात, भाउसाहेब कुशाबा झावरे, उत्तमराव दगडू चेमटे, दिनकर बाबाजी ठुबे, विष्णूपंत गणपत व्यवहारे, राजे हसन अमीर, बबन देवराम झावरे, लहू सयाजी घंगाळे, हरिश्चंद्र सावळेराम लोंढे, अनुष प्रविण पारेख, मारूती खंडू रोहोकले, निमाजी खंडू रोहोकले, बबन खंडू रोहोकले, सुधाकर गोपीनाथ सुंबे, गोपीनाथ शंकर सुंबे, महेश बबन झावरे व संगिता हरिश्चंद्र लोंढे यांचा शिक्षा झालेल्या अन्य गुन्हेगारांमध्ये समावेश आहे.
जिल्हा व सत्र न्यायाधीश एन.आर. नाईकवाडे यांच्यासमोर या खटल्याची सुनावणी सुरू न्यायाधीश नाईकवाडी यांनी संपदा पतसंस्थेच्या झालेल्या अपहार रक्कम १३ कोटी ३८ लाख ५५ हजार ६६७ रुपये प्रकरणी वेगवेगळ्या कलमांखाली या सर्व संचालक आरोपींना दोषी धरलेले आहे. सदर खटल्यामध्ये सरकारी पक्षाच्या वतीने अनिल ढगे यांनी काम बघितले. तर या संदर्भात लेखा परिक्षक देवराम मारूतराव बारसकर यांनी वरील आरोपींविरूध्द १ ऑगस्ट २०११ रोजी कोतवाली पोलिस स्टेशन अहमदनगर येथे फिर्याद दिली होती.
काय होता फिर्यादीचा आरोप…
फिर्यादीमध्ये विनातारण कर्ज नियमबाह्यरित्या कर्जदारांना वाटप करण्यात आलेले होते. तसेच सोने तारण कर्ज हेही नियमबाहय देण्यात आले होते. तसेच तत्कालीन संचालक मंडळाचे नातेवाईक व कर्मचारी यांनाही बेकायदेशीररित्या कर्ज वाटप करण्यात आलेले होते. वरील आरोपींनी सदर रक्कमेचा अपहार करून सदर रक्कम स्वतःच्या फायद्याकरिता वापरली होती. तसेच रकमेबाबत खोटया नोंदी करून सभासदास चुकीची माहिती देवून कायदेशिररित्या आर्थिक संस्था चालविताना ठेवीदाराच्या ठेवीचा विनीयोग बेकायदेशिरपणे अटी व नियम यांचे पालन न करता सभासदांच्या ठेवी परत करण्यास असमर्थता दर्शविली व ठेवीदारांचे रकमेची अफरातफर करून फसवणूक १३ कोटी ३८ लाख ५५ हजार ६६७ रुपये रकमेची फसवणूक केली.
सविस्तर निकालाचे वृत्त लवकरच देत आहोत.
