गुरुवार, दि. ११ एप्रिल
माजी खासदार भाऊसाहेब वाकचौरे आणि कडवट शिवसैनिकांमधील वाद सध्या न्यायालयीन प्रक्रियेत अडकला आहे. त्यातच वाकचौरे यांनी पुन्हा मातोश्रीची दारे ठोठावत शिवसेनेची (उद्धव बाळासाहेब ठाकरे गट) उमेदवारी मिळविण्यात यश मिळविले. मात्र या न्यायालयीन लढ्यामुळे शिवसैनिक वाकचौरे यांच्या प्रचारापासून चार हात दूर होते. संगमनेरमध्ये पार पडलेल्या महाविकास आघाडीच्या मेळाव्यात या संदर्भातील खदखद समोर आल्यानंतर या सर्वांमध्ये मनोमिलन घडविण्यात यश आले आहे.
शिवसेनेसोबत गद्दारी करत २०१४ मध्ये काँग्रेस कडून लोकसभेसाठी उमेदवारी करणाऱ्या माजी खासदार भाऊसाहेब वाकचौरे यांना तत्कालीन शिवसेना शहरप्रमुख अमर कतारी, भाऊसाहेब हासे यांच्यासह काही शिवसैनिकांनी त्यांना भर रस्त्यात जाब विचारण्याचा प्रकार घडला होता. त्यामुळे हा प्रकार पोलीस ठाण्यातून थेट न्यायालयात जाऊन पोहोचला. गेल्या दहा वर्षांपासून सुरू असलेल्या या खटल्याची सुनावणी आता अंतिम टप्प्यात आली आहे. निवडणुकीत वाकचौरे यांचा मोठ्या मताधिक्याने पराभव झाला बरोबरच हा वाद राज्यभरात चर्चिला गेला होता. वाकचौरे व कडवट शिवसैनिकांमधील वाद विकोपाला पोहोचल्याने त्याचे निवडणुकीत दूरगामी परिणाम दिसण्याची चिन्ह होती.
आधी दहा वर्षांपासून कोर्टाच्या फेऱ्या मारणाऱ्या शिवसैनिकांवरील गुन्हे मागे घ्या, तरच निवडणुकीत प्रचार करू, अशी उघडपणे भूमिका काही कडवट शिवसैनिकांनी घेतल्याने वाकचौरे यांची मोठी पंचायत झाल्याचे दिसत होते.
थोरात यांचे आभार तर वाकचौरे यांच्या विषयी नाराजी…
बुधवारी संगमनेरमध्ये काँग्रेसचे ज्येष्ठ नेते आमदार बाळासाहेब थोरात यांच्या माध्यमातून वाकचौरे यांच्या प्रचाराची दिशा ठरविण्यासाठी महाविकास आघाडीच्या मेळाव्याचे आयोजन करण्यात आले होते. या मेळाव्यात कतारी यांनी तत्कालीन मंत्री बाळासाहेब थोरात यांच्या विरोधात चुकीच्या पद्धतीने केलेल्या आंदोलनाचा दाखला देत या संदर्भात संगमनेरच्या जिल्हा व सत्र न्यायालयात भाऊसाहेब हासे विरोधात खटला सुरू आहे. अशा परिस्थितीत देखील थोरात यांनी मनाचा मोठेपणा दाखवत मदत करत पुढील काळात एकदिलाने काम करण्याचा संदेश दिला. याबद्दल त्यांनी थोरात यांच्या आभार मानले. मात्र असा प्रकार आमच्या नेत्याकडून म्हणजेच माझी खासदार वाकचौरे यांच्याकडून घडत नसल्याबद्दल खेद व्यक्त केला.
मनोमिलन घडविण्यात यश…
त्यामुळे या मेळाव्यानंतर युवा सेनेचे तालुकाप्रमुख अक्षय रावसाहेब गुंजाळ यांनी कतारी, हासे यांच्यासह अन्य शिवसैनिक आणि वाकचौरे यांच्यात मध्यस्थी घडवून आणण्यासाठी माजी तालुकाप्रमुख ज्येष्ठ नेते रावसाहेब गुंजाळ यांच्या निवासस्थानी चर्चा घडवून आणली. या चर्चेत न्यायालयीन कामकाजात योग्य तो मदतीचा शब्द मिळाल्यानंतर मनोमिलन घडविण्यात पदाधिकाऱ्यांना यश आले. त्यानंतरच वाकचौरे यांच्यासाठी हे माजी पदाधिकारी प्रचारात सहभागी होण्याचे चिन्ह आहेत.
वाकचौरे यांची वाट खडतरच…
उमेदवारी मिळविण्यात, पक्षांतर्गत नाराजांची मोट बांधण्यात माजी खासदार भाऊसाहेब वाकचौरे यशस्वी झाले असले तरी निवडणुकीत मात्र त्यांची वाट खडतर असल्याचे चित्र आहे. अनेक ठिकाणी त्यांना मतदारांच्या प्रश्नांच्या सरबत्तीला सामोरे जावे लागणार आहे. पदाधिकाऱ्यांचे अंतर्गत वाद, जिल्ह्यातील वरिष्ठ नेत्याकडून या वादाला घातले जाणारे खतपाणी या पार्श्वभूमीवर अंतर्गत कलहासोबतच बाहेर मतदारांची विनवणी करत आपली भूमिका मांडण्याचे कसब वाकचौरेना दाखवावे लागणार आहे. ते मतदारांना कसे सामोरे जातात, मतदार वाकचौरे यांच्याकडे कसे बघतात यावर त्यांचे भवितव्य अवलंबून असेल.
