शनिवार, दि. १३ एप्रिल
लोकसभा निवडणुकीच्या पार्श्वभूमीवर कायदा व सुव्यवस्था राखण्यासाठी रेकॉर्डवरील गुन्हेगारांवर कारवाईसत्र पोलीस प्रशासनाकडून सुरू आहे. गेल्या दोन दिवसात २५ जणांवर हद्दपारची कारवाई केल्यानंतर शनिवारी पुन्हा आणखी एका गुन्हेगारावर हद्दपारची कारवाई करण्यात आली आहे.
सिद्धार्थ उर्फ सिद्धांत दीपक मावस (रा. चत्तर हॉस्पिटलजवळ, संगमनेर खुर्द, संगमनेर) असे हद्दपार करण्यात आलेल्या व्यक्तीचे नाव आहे. मावस याला नगर जिल्ह्यासह लगतच्या सिन्नर व जुन्नर तालुक्यातून देखील हद्दपार करण्यात आले असल्याचे आदेश संगमनेरचे प्रांताधिकारी शैलेंद्र हिंगे यांनी दिले असल्याची माहिती पोलीस उपअधीक्षक सोमनाथ वाघचौरे यांनी दिली.
मावस याच्या विरुद्ध संगमनेर शहर पोलीस ठाण्यात चोरीसह शरीरा विरुद्ध व माला विरुद्ध गंभीर स्वरूपाचे सात गुन्हे दाखल आहे. शहर पोलीस ठाण्याचे पोलीस निरीक्षक भगवान मथुरे यांनी त्याच्या हद्दपारीचा प्रस्ताव पोलीस उपाधीक्षक सोमनाथ वाघचौरे यांच्याकडे पाठवला होता. वाघचौरे यांनी या प्रस्तावावर पुढील कारवाईसाठी तो पुढे प्रांताधिकारी हिंगे यांच्याकडे पाठविला होता. प्रांताधिकार्‍यांसमोर झालेल्या चौकशी त्यांनी मावस याला अहमदनगर जिल्ह्यासह शेजारच्या सिन्नर आणि जुन्नर तालुक्यातील तीन महिन्यांसाठी हद्दपार करण्याचे आदेश पारित केले.
