रविवार, दि. १४ एप्रिल
रोज काही ना काही घटना घडणाऱ्या संगमनेर मध्ये शनिवारी दाखल झालेल्या गुन्ह्यातून नवीन प्रकार समोर आला आहे. शहरातील एका महिलेने एका सलूनमध्ये आपला विनयभंग करण्यात आल्याची तक्रार केली तर सलून चालकाने सदर महिलेने आपल्या दुकानात गोंधळ घालून धमकी देत जातीवाचक शिवीगाळ केली असल्याची तक्रार पोलीस ठाण्यात दिली आहे. दोन्ही तक्रारीवरून शहर पोलिसांनी विनयभंग आणि ॲट्रॉसिटीचा गुन्हा दाखल केला आहे.
संगमनेर शहरामध्ये जावेद हबीब सलून या दुकानाची फ्रेंचाईजी आहे. या दुकानांमध्ये कृष्णा सारडा नावाची एक महिला स्वतःचे केस वॉश करण्यासाठी गेली होती. सदर महिलेला तेथील स्टाफमध्ये काम करणाऱ्या एका शाकिब नावाच्या मुस्लिम कर्मचाऱ्याने हेअर वॉशच्या वेळी मॅडम तुम्ही आज खूप सुंदर दिसता, तुमच्या शरीरावर आणखी कुठे टॅटू आहेत, हे पाहायला आवडेल. मी तुमची चांगली मसाज करून देईल असे बोलत महिलेला लज्जा उत्पन्न होईल असे वर्तन केले म्हणून सदर महिलेने त्याच्याविरुद्ध शहर पोलीस ठाण्यात फिर्याद दिल्याने शाकिब (पूर्ण नाव माहित नाही) याच्यावर विनयभंगाचा गुन्हा पोलीस ठाण्यात दाखल करण्यात आला आहे.
तर दुसरीकडे सदर महिलेचे स्वतःचे ब्युटी पार्लरचे दुकान असून देखील ही महिला आमच्या दुकानात येऊन हेयर वॉश करते. शिवाय ती प्रत्येक वेळी भांडण करत आली आहे. आजपर्यंत तीन-चार वेळा अशी घटना घडली आहे. सदर महिलेने आमच्या दुकानात आरडाओरडा करीत आम्ही मारवाडी आहोत. आमचे धंदे असतात. तुम्ही महारडे हेअर सलूनचे धंदे करायला लागले काय ? दुकान कसे काय चालवता तेच पाहते. मुलांना येथे बोलवून तुमचे दुकान फोडून बंद करून टाकेल. लांडे असेच असतात. या लांड्यांना कामावर का ठेवतात. तुमची लायकी विसरले काय ? तुम्हाला तुमची लायकी दाखवते. अशी धमकी देत हाताने मारहाण करत दुकानात गोंधळ घालून. आम्हाला जातीवाचक शिवीगाळ केली आहे, अशी फिर्याद दुकान चालक आशिष सुनील महिरे, (हल्ली रा. गणेश नगर, संगमनेर मूळ राहणार शिवाजीनगर, सातपूर, नाशिक) यांनी दिल्याने सदर महिलेविरुद्ध अनुसूचित जाती जमाती अत्याचार प्रतिबंधक कायद्यानुसार (ॲट्रॉसीटी) पोलिसांनी गुन्हा दाखल केला आहे.
पोलीस निरीक्षकावर गंभीर स्वरूपाचे आरोप…
संबंधित एका महिलेने शहर पोलीस ठाण्याच्या पोलीस निरीक्षकांवर शारीरिक संबंधाच्या मागणीचे गंभीर स्वरूपाचे आरोप केले असून यामुळे पोलीस दलात व संगमनेरकरांमध्ये खळबळ उडाली आहे. या संदर्भात संबंधित महिलेने पोलीस अधीक्षक राकेश ओला, संगमनेरचे पोलीस उपअधीक्षक सोमनाथ वाघचौरे यांच्याकडे तक्रार केली आहे. संबंधित पोलीस निरीक्षकावर कारवाई न झाल्यास पोलीस ठाण्यात आत्मदहन करण्याचा इशारा या महिलेने दिला आहे. यासंदर्भात अधिक माहितीसाठी महाराष्ट्र संवाद न्यूजने संगमनेरचे पोलीस उपअधीक्षक सोमनाथ वाघचौरे व पोलीस निरीक्षक भगवान मथुरे यांच्याशी संपर्क केला असता त्यांच्याकडून प्रतिसाद मिळू शकला नाही.
