शुक्रवार, दि.१९ एप्रिल
पोलिसांच्या ११२ क्रमांकावर कॉल आला. कॉल करणाऱ्या व्यक्तीने हद्दपार करण्यात आलेला इसम हा शहरातील इंदिरानगर भागात फिरत असल्याची माहिती दिली. त्यामुळे तातडीने मिळालेल्या माहितीची खातर जमा करण्यासाठी पोहोचलेल्या पोलीस पथकाला धीरज राजेंद्र पावडे हद्दपारीच्या आदेशाचे उल्लंघन करून गावात फिरताना आढळून आल्याने त्याला पकडण्यात आले.
धीरज राजेंद्र पावडे याला संगमनेरच्या प्रांत अधिकाऱ्यांनी संगमनेर तालुक्याच्या महसूल स्थळ सीमेतून २४ एप्रिल पर्यंत हद्दपार करण्याचे आदेश काढले होते. प्रांत अधिकाऱ्यांच्या आदेशाचे पालन करत पावडे याला हे आदेश पोलिसांनी बजावले होते. मात्र या आदेशाचे उल्लंघन करून तो शहरात फिरत होता.
त्यामुळे अज्ञात व्यक्तीने यासंदर्भात पोलिसांच्या ११२ क्रमांकावर फोन करत यासंदर्भात माहिती दिली होती. माहिती मिळाल्यानंतर पोलीस पथक इंदिरानगर परिसरात गेल्यावर त्यांना बुधवारी राम नवमीच्या दिवशी चार वाजण्याच्या सुमारास हद्दपार करण्यात आलेल्या धीरज पावडे आढळून आला. पथकाने त्याला ताब्यात घेतले.
यासंदर्भात महिला पोलीस नाईक सुजाता पांडुरंग थोरात यांनी दिलेल्या फिर्यादीवरून आरोपी धीरज पावडे यांच्या विरोधात भारतीय दंड विधान संहिता कलम १८८ प्रमाणे फिर्याद दाखल करण्यात आली आहे.
