शुक्रवार, दि. ३ मे
लक्ष्मी देवीच्या यात्रेनिमित्त सुरू असलेल्या छबिना मिरवणुकीत तरुणावर झालेल्या सशस्त्र हल्ल्यात त्याचा मृत्यू झाला. नगर जिल्ह्यातील शेवगावमधील शहर टाकळी येथे गुरुवारी (दि. २) रात्री ही घटना घडली. अक्षय संजय आपशेटे (वय २४ वर्ष, रा. शहर टाकळी, शेवगाव) असे हत्या झालेल्या तरुणाचे नाव आहे.
यासंदर्भात मृत तरुणाचा भाऊ संकेत संजय आपशेटे याने दिलेल्या फिर्यादीवरून शेवगाव पोलीस ठाण्यात अजय दावीद कोल्हे, किरण उत्तम चव्हाण, पंकज लक्ष्मण कोल्हे, अविनाश साईनाथ पवार व विकास संजय कोल्हे या पाच आरोपींविरुद्ध खुनासह विविध कलमा अंतर्गत गुन्हा दाखल करण्यात आला आहे.
संकेत आपशेटे ज्यांनी दिलेल्या फिर्यादीत म्हटले आहे की, २ मे रोजी रात्री दहा वाजता ते चुलत भावासह गावाच्या यात्रेत फिरत असताना पावणे अकरा वाजण्याच्या सुमारास यात्रेतून जोरात आरडाओरडा करण्याचा आवाज आल्याने आवाजाच्या दिशेने जाऊन बघितले असता लक्ष्मी माता मंदिराजवळ माझा लहान भाऊ अक्षय आपशेटे याला गावातीलच ओळखीचे अजय कोल्हे हा हातातून सुरीने, किरण चव्हाण हातातील सत्तुरने, पंकज कोल्हे हातातील फायटरने, अविनाश पवार हातातील लोखंडी रॉडने, विकास कोल्हे हा त्याच्या हातातील लाकडी काठीने मारहाण करत असल्याचे दिसले. यावेळी त्यांच्यासोबत गावातील आणखी तीन-चार जण होते.
जखमी अवस्थेत अक्षयला गावातील रुग्णालयात उपचारासाठी नेले असता त्यांनी शेवगाव येथील ग्रामीण रुग्णालयात नेण्यास सांगितले. ग्रामीण रुग्णालयात उपचारादरम्यान त्याचा मृत्यू झाला असल्याचे म्हटले आहे.
दरम्यान शेवगाव पोलीस ठाण्यात याप्रकरणी गुन्हा दाखल झाल्यानंतर एका आरोपीला अटक करण्यात आले असून अन्य आरोपी फरार आहेत. फरार आरोपींचा पोलीस शोध घेत असल्याची माहिती पोलीस निरीक्षक दिगंबर भदाणे यांनी दिली.
