रविवार, दि. ५ मे
असंख्य कारवायानंतर देखील संगमनेरमधील बेकायदेशीर कत्तलखाने सुरूच आहे. शहरात मदिना नगर भागात संगमनेर अकोल्याचे पोलीस उपअधीक्षक सोमनाथ वाघचौरे यांच्या पथकाने केलेल्या कारवाईत शनिवारी दुपारी तीन लाख रुपये किमतीचे दीड हजार किलो गोमांस पोलिसांनी पकडले आहे.
याप्रकरणी शहर पोलीस ठाण्यात पोलीस नाईक राहुल कचरू डोके यांनी दिलेल्या फिर्यादीवरून साहील इजराइल कुरेशी (वय २० वर्षे रा. मदिनानगर) व हाश्मी नशीर कुरेशी उर्फ बुड्डी (वय ३२ वर्षे रा. मदिनानगर) या दोघांविरुद्ध गुन्हा दाखल करण्यात आला त्यांना ताब्यात घेतल्याची माहिती देण्यात आली आहे.
अधिक माहिती अशी, पोलीस उपअधीक्षक सोमनाथ वाघचौरे यांना शनिवारी शहरातील मदिना नगर भागात असलेल्या गौसिया मज्जिद शेजारी गोवंश जनावरांची कत्तल केली जात असल्याची माहिती मिळाली होती. त्यानंतर वाघचौरे यांनी पोलीस उपनिरीक्षक निवांत जाधव, पोलीस कर्मचारी राहुल डोके व राहुल सारबंदे यांच्या पथकाला कारवाई करण्याचे आदेश दिले.
दुपारी दोन वाजता पथकाने मदिनानगर मधील गल्ली क्रमांक १ मध्ये असलेल्या गौसीया मस्जीद शेजारील पत्राच्या शेडच्या आडोशाला जात खात्री केली असता अल्टो कारमध्ये (एम.एच. १२ डी.एस. १७६८) अंदाजे दोनशे किलो वजनाचे गोमांस आढळून आले. पथकाने शेजारील वाड्यात तपासणी केली असता तेथे देखील १३०० किलो गोमांस आढळले.
घटनास्थळी पोलीस पथकाने साहील इजराइल कुरेशी या वीस वर्षाच्या तरुणाला पकडले. त्याच्याकडून मिळालेल्या माहितीत या गोमांसाचा मूळ मालक हाश्मी नशीर कुरेशी उर्फ बुड्डी असल्याचे समोर आले. या कारवाईत पोलिसांनी दीड हजार किलो गोमांस आणि अल्टो कार जप्त केली आहे. तसेच दोन्ही आरोपीविरुद्ध गुन्हा दाखल करण्यात आला. पोलीस पुढील तपास करत आहे.
