गुरुवार, दिनांक ९ मे
अहमदनगरमध्ये पुन्हा एकदा वकिलावर प्राणघातक हल्ल्याचा प्रकार समोर आला आहे. बुधवारी दुपारी साडेचार वाजता जुन्या कोर्टाजवळ लोणी हवेली (ता. पारनेर) येथील वकील अशोक कोल्हे यांच्यावर प्राणघातक हल्ला करण्यात आला. पोलिसांनी तातडीने तपास यंत्रणा राबवत गुन्हा दाखल करण्यापूर्वीच हल्लेखोरास पकडण्यात यश मिळविले असल्याची माहिती कोतवाली पोलीस ठाण्याचे वरिष्ठ पोलीस निरीक्षक प्रताप दराडे यांनी दिली आहे.
अधिक माहिती अशी, ॲड. मयूर अशोक कोल्हे हे आपल्या वकील असलेल्या वडिलांसह न्यायालयीन कामकाजानिमित्त लोणी हवेली (ता. पारनेर) येथून अहमदनगरला आले होते. ॲड. अशोक कोल्हे अहमदनगरमधील जुन्या न्यायालयाजवळ असताना दुपारी साडेचार वाजण्याच्या सुमारास काही एक कारण नसताना त्यांचा पक्षकार अनिल गायकवाड यांने “तुला जिवंत सोडणार नाही, असे म्हणून हातात धारदार शस्त्र घेत वकिलावर धावून जात त्यांना जीवे मारण्याचा प्रयत्न केला” या हल्ल्यात वकील कोल्हे यांच्या डाव्या गालावर तसेच डोक्याला गंभीर दुखापत झाली असून त्यांच्यावर नगरच्या खाजगी रुग्णालयात अतिदक्षता विभागात उपचार सुरू आहे. हल्ला केल्यानंतर हल्लेखोर पक्षकार तिथून पसार झाला होता.
दरम्यान वकिलावर प्राणघातक हल्ला केल्याचा प्रकार समजताच पोलीस अधीक्षक राकेश ओला यांनी या हल्ल्याचे गांभीर्य लक्षात घेत पोलीस निरीक्षक प्रताप दराडे यांना कोणत्याही परिस्थितीत आरोपीचा शोध घेऊन त्याला अटक करण्याचा सूचना दिल्या. गुन्हे शोध पथकाच्या सहाय्यक पोलीस निरीक्षक योगिता कोकाटे, पोलीस कॉन्स्टेबल तानाजी पवार, सुरज कदम, सुजय हिवाळे यांनी घटनास्थळी दाखल होत माहिती घेतली तसेच रुग्णालयात जात घडलेल्या घटनेचा तपशील जाणून घेतला.
अनिल लक्ष्मण गायकवाड (रा. बोल्हेगाव, अहमदनगर) या रेकॉर्डवरील गुन्हेगार तसेच कोल्हे यांच्या पक्षकारानेच हा हल्ला केल्याचे समोर आल्यानंतर त्याला पकडण्यासाठी शोध सुरू केला. कोल्हे यांच्यावरील हल्ल्याचा गुन्हा दाखल होण्यापूर्वीच आरोपीला पकडण्यात पोलिसांना यश आले.
कोतवाली पोलीस ठाण्यात ॲड. मयूर कोल्हे यांनी दिलेल्या फिर्यादीवरून आरोपी विरोधात भारतीय दंड विधान संहिता कलम ३०७, ५०४, ५०६ आर्म ॲक्ट ४/२५ सह क्रिमिनल लॉ अमेंडमेंट कलम ७ प्रमाणे गुरुवारी मध्यरात्री गुन्हा दाखल करण्यात आला आहे.
