बुधवार, दि. १५ मे
शाळा बंद असल्याबाबतचे प्रमाणपत्र देण्यासाठी आणि शाळेची आरटीई मान्यता वर्धित करण्याचे काम करून दिल्याच्या बदल्यात पन्नास हजार रुपयांची लाच घेणारा शिक्षण अधिकारी (प्राथमिक) बुधवारी एसीबीच्या जाळ्यात अडकला.
सतीश सुरेश चौधरी (वय ५२ वर्ष, रा. शांतीनगर, नंदुरबार) असे लाचखोर जिल्हा शिक्षण अधिकाऱ्याचे नाव असून ते नंदुरबार येथे कार्यरत आहे
तक्रारदार यांना नवापूर शहर नगरपालिका हद्दीत मालमत्ता क्रमांक ८२६, सिटी सर्वे क्रमांक ६२४, पंचरत्न शॉपिंग कॉम्प्लेक्स येथे नम्रता हॉटेल सुरू करावयाचे असल्याने सदर परिसरात ७५ मीटर अंतरावर बंद पडलेली जिल्हा परिषद शाळा असल्याने उत्पादन शुल्क विभागाने FL३ परवाना देण्यास हरकत घेतली होती.
परंतु सदर शाळा इमारत ही जीर्ण होऊन बंद असल्याने नंदुरबार प्राथमिक शिक्षण विभागाकडून सदरची शाळा बंद असल्याबाबत प्रमाणपत्र देण्यासाठी तसेच अश्रफभाई माजिदभाई लखानी अल्पसंख्यांक विकास बहुउद्देशीय संस्था नवापूर या संस्थेअंतर्गत येणाऱ्या गुजराती माध्यमिक विद्यालय, नवापूर शाळेची आरटीई मान्यता वर्धित करून दिल्याच्या बदल्यात अशा दोन्ही कामांचे बक्षीस म्हणून आरोपी शिक्षणाधिकारी सतीश चौधरी याने पन्नास हजार रुपयांची मागणी करून आज रोजी (दि. १५ मे) जिल्हा परिषदेच्या कार्यालयातील दालनात लाचेची रक्कम स्वीकारताना लाच लुचपत विभागाच्या अधिकाऱ्यांनी रंगेहात पकडले. लाचखोर शिक्षण अधिकारी अटक करण्यात आली असून नंदुरबार शहर पोलीस ठाण्यात सतीश चौधरी यांच्या विरोधात गुन्हा दाखल करण्याचे काम सुरू होते.
यांनी केली कारवाई…
पोलीस निरीक्षक नितीन पाटील, पोलीस नाईक चौधरी, पोलीस शिपाई अनिल गांगोडे, पोलीस नाईक गणेश निंबाळकर यांच्या पथकाने ही कारवाई केली.
