दाखल गुन्ह्यात सर्रासपणे पोलीस अधिकारी, कर्मचाऱ्यांकडून केली जाते लाचेची मागणी
दाखल गुन्ह्यांचा तपास होणार तरी कसा
लाचखोरांकडून शेपन्नास, हजारावरून लाचेची मागणी आता लाखाच्या, कोटीच्या घरात!
शनिवार, दि. १८ मे
महावितरणमध्ये नोकरीस असलेल्या कर्मचाऱ्यावर दाखल असलेल्या मीटर चोरीच्या गुन्ह्यात पुढील कारवाई न करण्यासाठी उपनिरीक्षकाने तक्रारदार आरोपीकडे पाच लाखाची लाच मागितल्याचा धक्कादायक प्रकार समोर आला आहे. दरम्यान लाच मागणाऱ्या पोलीस उपनिरीक्षकाविरुद्ध पोलीस ठाण्यात गुन्हा दाखल करण्यात आला आहे.
दत्तात्रेय सर्जेराव शेगर असे या लाचेची मागणी करणाऱ्या, गुन्हा दाखल झालेल्या पोलीस उपनिरीक्षकाचे नाव असून पुण्याच्या चंदननगर पोलीस ठाण्यात त्यांची नियुक्ती आहे.
मिळालेल्या माहितीनुसार, अँटी करप्शनच्या अधिकाऱ्यांनी शुक्रवारी ही कारवाई केली असून अँटी करप्शनकडे (ACB) तक्रार करणारे तक्रारदार हे महावितरणमध्ये नोकरीस आहे. त्यांच्याविरुद्ध चंदननगर पोलीस ठाण्यात मीटर चोरीचा गुन्हा दाखल आहे. चंदननगर पोलीस ठाण्यातील पोलीस उपनिरीक्षक दत्तात्रेय शेगर यांनी सदर गुन्ह्याचा तपास स्वतः करत असल्याचे सांगून तक्रारदाराविरुद्ध दाखल असलेल्या गुन्ह्यात पुढील कारवाई न करण्यासाठी पाच लाख रुपयांच्या लाचेची मागणी केली होती.
त्यामुळे तक्रारदाराने यासंदर्भात अँटी करप्शन विभागाकडे तक्रार केली. अँटी करप्शन विभागाच्या पडताळणीमध्ये उपनिरीक्षक शेगर याने पाच लाख रुपयांची मागणी करून तडजोडअंती तीन लाख रुपयांची मागणी केल्याचे निष्पन्न झाले. त्यामुळे पोलीस उपनिरीक्षक शेगर यांच्याविरुद्ध लाच मागणीचा गुन्हा चंदननगर पोलीस ठाण्यात नोंद करण्यात आला असून पुढील तपास अँटी करप्शनचे पोलीस निरीक्षक रुपेश जाधव करत आहे.
