बुधवार, दि. २९ मे | अनंत पांगारकर
तब्बल नऊ महिने फरार राहिलेला दूधगंगा नागरी सहकारी पतसंस्थेचा चेअरमन भाऊसाहेब कुटे याच्या पोलीस कोठडीची मुदत बुधवारी संपल्यानंतर त्याला संगमनेरच्या जिल्हा न्यायालयाने १३ जूनपर्यंत न्यायालयीन कोठडी सुनावली. कुटेला न्यायालयीन कोठडी मिळाल्याने त्याच्याकडून जामीन अर्ज दाखल होण्याची शक्यता निर्माण झाल्याने ठेवीदारांच्या चिंतेत वाढ झाली आहे.
दूधगंगा पतसंस्थेचा संस्थापक चेअरमन असलेल्या भाऊसाहेब कुटेसह २१ जणांविरोधात संगमनेर शहर पोलीस ठाण्यात ८१ कोटीच्या अपहार प्रकरणी गुन्हा दाखल आहे. गुन्हा दाखल झाल्यापासून कुटे फरार होता. याच गुन्ह्यात त्याच्या कुटुंबियांना थेट सर्वोच्च न्यायालयाकडून दिलासा मिळाल्यानंतर २४ मे रोजी कुटे स्वतःहून पोलीस ठाण्यात हजर झाला होता. त्यानंतर न्यायालयाने त्याला पाच दिवस पोलीस कोठडी सुनावली होती.
बुधवारी कोठडीची मुदत संपल्यानंतर कुटेला संगमनेरचे जिल्हा व अतिरिक्त सत्र न्यायाधीश दिलीप घुमरे यांच्यासमोर आणण्यात आले होते. या गुन्ह्यातील बहुतांशी तपास पूर्ण झाल्याने तपास अधिकाऱ्यांनी पोलीस कोठडीऐवजी कुटेला १४ दिवस न्यायालयीन कोठडी देण्याची मागणी केली. न्यायालयाने ही मागणी मान्य केल्याने आता कुटेची रवानगी न्यायालयीन कोठडीत झाली आहे.
दरम्यान गेल्या वेळी प्रमुख सूत्रधार आरोपी असलेल्या कुटेला न्यायालयासमोर हजर केले असता न्यायालयाने पाच दिवसांची पोलीस कोठडी दिली होती. याच दरम्यान आरोपी कुटेच्यावतीने वैद्यकीय सुविधा मिळावी, औषधे उपलब्ध व्हावी, घरचे जेवण मिळावे यासाठी न्यायालयात अर्ज दिला होता. सहाय्यक सरकारी वकील मच्छिंद्र गवते यांनी या अर्जाला जोरदार हरकत घेत आरोपीने वैद्यकीय कागदपत्रे न्यायालयाला दिली नसल्याचे निदर्शनास सांगून दिले. यावर न्यायालयाचा निर्णय येणे बाकी आहे.
जामीन अर्ज दाखल होण्याची शक्यता…
दरम्यान न्यायालयाने प्रमुख आरोपी भाऊसाहेब कुटे याला न्यायालयीन कोठडी दिली असल्याने येत्या एक-दोन दिवसात आरोपी कुटे याच्याकडून जामीन अर्ज दाखल होण्याची शक्यता वर्तवली जात आहे. या गुन्ह्यातील व्यवस्थापक वगळता बहुतांशी आरोपींना न्यायालयाने जामीन मंजूर केला आहे. तर कुटे कुटुंबियासह कदम व अन्य काही आरोपींचे अटकपूर्व जामीन अर्ज जिल्हा व उच्च न्यायालयाने यापूर्वीच फेटाळून लावले आहेत.
