शुक्रवार, दि. ३१ मे
नाशिक विभागाच्या शिक्षक मतदार संघाच्या निवडणूक प्रक्रियेला शुक्रवारी सुरुवात झाली. या निवडणुकीसाठी पहिल्याच दिवशी नगर जिल्ह्यातील दोघा उमेदवारांनी तीन उमेदवारी अर्ज दाखल केले आहे. कोपरगावच्या भाजपच्या माजी आमदार स्नेहलता कोल्हे यांचे चिरंजीव विवेक बिपिनदादा कोल्हे यांनी दोन अपक्ष उमेदवारी अर्ज दाखल केले. याशिवाय डॉ. छगन भिकाजी पानसरे यांनी देखील हिंदुस्तान जनता पार्टी कडून उमेदवारी अर्ज दाखल केला आहे.
विधान परिषदेच्या नाशिकसह चार जागांसाठी २६ जून रोजी निवडणूक होत आहे. या निवडणुकीसाठी ७ जूनपर्यंत उमेदवारी अर्ज दाखल करण्याची मुदत आहे. उमेदवारी अर्ज दाखल करण्याच्या प्रक्रियेला आजपासून सुरुवात झाली.
१० जून रोजी दाखल उमेदवारी अर्जांची छाननी होणार असून उमेदवारी अर्ज मागे घेण्यासाठी १२ जूनची मुदत आहे. त्यानंतर या जागेसाठी २६ जून रोजी सकाळी ८ ते ४ या वेळेत मतदान होणार असून १ जुलै रोजी मतमोजणी होणार आहे.
नाशिक विभागात नाशिकसह अहमदनगर, जळगाव, धुळे आणि नंदुरबार या जिल्ह्यांचा समावेश असून या मतदारसंघातून गेल्यावेळी शिवसेनेचे (उद्धव बाळासाहेब ठाकरे) आमदार किशोर दराडे निवडून गेले होते. येत्या ७ जुलैला त्यांची मुदत संपत असल्याने या जागेसाठी निवडणूक होत आहे. दराडे हे देखील पुन्हा इच्छुक असून सध्या ते मुख्यमंत्री एकनाथ शिंदे यांच्या संपर्कात असल्याचे बोलले जाते.
शुक्रवारी उमेदवारी अर्ज दाखल करणारे विवेक कोल्हे भाजपकडून निवडणूक लढविण्यास इच्छुक असले तरी त्यांनी दोन उमेदवारी अर्ज दाखल केले असून हे दोन्ही अर्ज अपक्ष आहेत.
विवेक कोल्हे आणि महसूल मंत्री राधाकृष्ण विखे पाटील यांचा संघर्ष सर्वश्रुत असल्याने भाजपकडून या जागेवर विवेक कोल्हेना संधी मिळते की ऐनवेळी दुसरा उमेदवार दिला जातो, हे लवकरच समोर येणार आहे.
