शनिवार, दि. १ जून
‘गाढवाचं लग्न’ या वगनाट्यातून सर्व परिचित झालेल्या, आपल्या कारकिर्दीत १०० हून अधिक भूमिका साकारणाऱ्या लोक कलावंत प्रभा शिवणेकर यांनी वयाच्या ८१ व्या वर्षी अखेरचा श्वास घेतला. पिंपरी येथील एका खासगी रुग्णालयात त्यांच्यावर उपचार सुरू होते. या उपचारादरम्यानच शुक्रवारी (दि. ३१ मे) त्यांची प्राणज्योत मालवली.
अविवाहित असलेल्या प्रभा शिवणेकर आपल्या बहीण व भावांबरोबर राहायच्या. त्यांच्या भावंडांनीच त्यांचा शेवटपर्यंत सांभाळ केला. ‘गाढवाचे लग्न’ या वगनाट्यात त्यांनी गंगीची भूमिका साकारली होती. त्यांची ही भूमिका चांगलीच लोकप्रिय झाली होती. या नाटकाला केंद्र सरकारचा राष्ट्रपती पुरस्कार मिळाला होता. संगीत नाट्य अकादमीने त्यांना १९७४ मध्ये तत्कालीन राष्ट्रपतीच्या हस्ते राष्ट्रीय पुरस्कार देऊन सन्मानित केले. तर राज्य शासनाने विठाबाई नारायणगावकर पुरस्कार देऊन त्यांचा गौरव केला होता. तर प्रभा शिवणेकर यांचा जीवनपट उलगडून दाखवणाऱ्या ‘एका गंगीची कहाणी’ या चरित्रग्रंथाचे लेखन ज्येष्ठ साहित्यिक प्रभाकर ओव्हाळ यांनी केले.
शिवणेकर यांनी वगसम्राट दादू इंदुरीकर, अभिनय सम्राट शंकरराव शिवणेकर, शाहीर अमर शेख, विठाबाई नारायणगावकर, रघुवीर खेडकर, कांताबाई सातारकर, तुकाराम खेडकर आणि चंद्रकांत ढवळपुरीकर यांच्याबरोबर साकार केलेल्या भूमिका अजरामर झाल्या आहेत.
