सोमवार, दि. ३ जून (अनंत पांगारकर)
लोकसभा निवडणुकीचे मतदान पार पडले असून उद्या मंगळवारी देशभरात मतमोजणी होत आहे. ही रणधुमाळी आटोपत असतानाच राज्यातील विधान परिषदेच्या चार जागांवर निवडणूक होत आहे. महायुतीत बिघाडी झाल्याचे चित्र समोर येत असून नाशिक वगळता उर्वरित तीन मतदारसंघात भाजपने आपले उमेदवार सोमवारी जाहीर केले.
ट्विस्ट… कोकण पदवीधर, मुंबई पदवीधर, मुंबई शिक्षक आणि नाशिक शिक्षक या चार मतदारसंघासाठी निवडणूक होत असून सोमवारी उमेदवारी अर्ज दाखल करण्याचा दुसरा दिवस होता. दुसऱ्या दिवसाअखेर नासिक पदवीधर मतदारसंघात मोठा ट्विस्ट बघायला मिळत असताना नाशिक वगळता उर्वरित तीन जागांवर भाजपने आपले उमेदवार जाहीर केले आहे.
यांना संधी… कोकण पदवीधर मतदार संघात भाजपाने विद्यमान आमदार निरंजन डावखरे यांना संधी दिली तर मुंबई पदवीधर मतदारसंघात किरण शेलार आणि मुंबई शिक्षक मतदार संघात शिवनाथ दराडे यांची उमेदवारी जाहीर करण्यात आली आहे. मात्र नाशिक शिक्षक मतदार संघाच्या जागेवर मोठा पेच निर्माण झाल्याने महायुती अथवा भाजपने या जागेवरील आपला उमेदवार अद्याप जाहीर केला नाही.
मनसे विरुद्ध भाजप… २६ जून रोजी या चार मतदार संघासाठी निवडणूक होत आहे. लोकसभेची निवडणूक महायुतीने एकत्रित लढविली असली तरी विधान परिषदेच्या या चार जागांवर मात्र त्यांच्यात एकमत झालेल दिसत नाही. लोकसभा निवडणुकीत महायुतीला बिनशर्त पाठिंबा देणाऱ्या महाराष्ट्र नवनिर्माण सेनेच्या राज ठाकरे यांनी भाजपाचा विद्यमान आमदार असलेल्या कोकण पदवीधर मतदार संघात यापूर्वीच मनसेकडून अभिजीत पानसे यांना उमेदवारी जाहीर केली. त्यामुळे भाजपच्या अडचणीत वाढ झाली होती. भाजपा या जागेवर मनसेला संधी देईल असे चित्र असतानाच आता भाजपाने कोकण पदवीधर मतदारसंघातून पुन्हा निरंजन डावखरे यांना संधी दिल्याने येथील लढत रंगण्याची चिन्हे आहेत.
असा रंगणार सामना… दुसरीकडे मुंबई पदवीधर मतदारसंघात भाजपने किरण शेलार यांना उमेदवारी दिली असून त्यांना उद्धव बाळासाहेब ठाकरे यांच्या पक्षाच्या अनिल परब यांच्याशी सामना करावा लागणार आहे. तर मुंबई शिक्षक मतदार संघातून भाजपने संधी दिलेल्या शिवनाथ दराडे यांना ठाकरे गटाच्याच ज. मो. अभ्यंकर यांच्याशी लढावे लागणार आहे.
नासिकमध्ये कोल्हेंनी वाढविली डोकेदुखी…
नासिक शिक्षक मतदार संघातून सुरुवातीलाच भाजपाच्या माजी आमदार स्नेहलता कोल्हे यांचे सुपुत्र भाजप नेते विवेक कोल्हे यांनी अपक्ष उमेदवारी अर्ज दाखल केला आहे. तर या मतदारसंघात विद्यमान आमदार असलेल्या ठाकरे गटाच्या किशोर दराडे यांना शिवसेना ठाकरे गटाने उमेदवारी नाकारत ॲड. संदीप गुळवे यांना उमेदवारी दिले आहे. याशिवाय सोमवारी राज्यातील भाजपचे मातब्बर नेते आणि राज्याचे महसूल मंत्री असलेल्या राधाकृष्ण विखे यांचे बंधू डॉ. राजेंद्र विखे पाटील यांनी उमेदवारी अर्ज दाखल केला आहे. त्यामुळे कोल्हे आणि विखे हे भाजपाचे दोन प्रबळ उमेदवार एकमेकांसमोर ठाकले आहेत. विद्यमान आमदार किशोर दराडे हे देखील शिवसेना शिंदे गटाकडून उमेदवारी मिळविण्यासाठी इच्छुक असल्याने त्यांची देखील उमेदवारी महत्त्वाची ठरणार आहे. त्यामुळे ही जागा शिंदे गटाकडे जाते की भाजपकडे हे देखील लवकरच समजेल. या जागेवर देखील महायुतीचे भवितव्य अवलंबून असेल. मात्र सद्यस्थितीत तरी या मतदारसंघात विवेक कोल्हे डॉ. राजेंद्र विखे ॲड. संदीप गुळवे आणि विद्यमान आमदार किशोर दराडे यांच्यात सामना रंगण्याची चिन्ह आहेत.
