सोमवार, दि. ३ जून
पुणे सीमा शुल्क विभागाच्या अमली पदार्थ विरोधी पथकाने तब्बल २ कोटी २० लाख रुपये किमतीचा ८८३ किलो गांजा जप्त केला आहे. एका आयशर ट्रकद्वारे ओरिसा राज्यातून हा गांजा महाराष्ट्रात येत असल्याची माहिती पथकाला मिळाली होती.
देशभरात गांजा विक्रीला बंदी असली तरी सर्वत्र मुबलक गांजा मिळत असल्याचे चित्र सर्रासपणे दिसते. गांजाची राज्यात मोठी बाजारपेठ असल्याचे अनेकदा समोर आले आहे. त्यामुळे आता पकडलेला गांजा महाराष्ट्रात कोठे वितरित होणार होता याचा देखील शोध पथकाला घ्यावा लागणार आहे.
ओरिसा येथून एका आयशर ट्रकद्वारे हा गांजा महाराष्ट्रात येणार असल्याची माहिती सीमा शुल्कच्या अधिकाऱ्यांना मिळाली होती. यानंतर पुणे सीमा शुल्क विभागाच्या एका पथकाने सोलापूरमध्ये जात संशयित ट्रकचा शोध घेतल्यानंतर तो पथकाला आढळून आला. याप्रकरणी पथकाने सुधीर चव्हाण (वय ३२, रा. नरसिंगपूर, जि. सोलापूर) याला अटक केली आहे.
चलाखी… पथकाने पकडलेला ट्रकची पाहणी केली असता कोणाला संशय किंवा गांजाचा वास येऊ नये यासाठी कोंबड्यांची विष्ठा असलेल्या पोत्याखाली तब्बल सव्वा दोन कोटी रुपयांचा हा गांजा दडवून ठेवण्यात आला होता. पोलिसांनी गांजा जप्त केला असून पकडलेला आरोपी सुधीर चव्हाण हा स्वतः या गांजाचा मालक असल्याचे व ओरिसावरून तो ट्रकमधून स्वतः गांजा घेऊन असल्याचे समोर आले आहे. सोलापूर भागात या गांजाची विक्री केली जाणार असल्याची माहिती मिळत असून चव्हाण याला ओरिसातून सोलापूरपर्यंत हा गांजा आणण्यासाठी कोणी-कोणी मदत केली, याचा शोध सीमा शुल्क विभागाचे पथक घेत असल्याची माहिती सीमा शुल्क विभागाच्या आयुक्त यशोधन वनगे यांनी दिली.
