शुक्रवार दिनांक ७ जून २०२४
नाशिक शिक्षक मतदार संघातून उमेदवारी अर्ज दाखल करण्यासाठी आज (दि. ७) अखेरचा दिवस आहे. आत्तापर्यंत २२ उमेदवारांनी आपले उमेदवारी अर्ज दाखल केले आहेत. महाविकास आघाडीने शिवसेना (उद्धव बाळासाहेब ठाकरे) गटाकडून ॲड. संदीप गुळवे यांना उमेदवारी दिली आहे. तर महायुतीचा उमेदवार अद्यापही निश्चित झालेला नाही.
शिक्षक मतदार संघासाठी जाहीर झालेल्या निवडणुकीच्या रिंगणात उभे राहण्यासाठी ७८ इच्छुक उमेदवारांनी अर्ज नेले असून त्यापैकी केवळ २२ उमेदवारी अर्ज दाखल झाले आहेत. उमेदवारी अर्ज दाखल करण्याचा आज शेवटचा दिवस असल्याने प्रमुख उमेदवार शक्ती प्रदर्शन करत अर्ज दाखल करणार असल्याने विभागीय आयुक्तालय गजबजणार आहे.
या मतदारसंघातून विद्यमान आमदार किशोर दराडे हे ठाकरे गटाचे आमदार होते. मात्र त्यांना पक्षाने उमेदवारी नाकारत गुळवे यांना आपला उमेदवार जाहीर केल आहे. त्यामुळे दराडे शिंदे गटाकडून लढणार की अपक्ष हा पेच अद्यापही कायम आहे. तूर्तास तरी दराडे यांनी अपक्ष उमेदवारी अर्ज दाखल केला आहे.
याशिवाय भाजपाच्या माजी आमदार स्नेहलता कोल्हे यांचे सुपुत्र विवेक कोल्हे यांनीदेखील अपक्ष उमेदवारी अर्ज दाखल केला असून राज्याचे महसूल मंत्री राधाकृष्ण विखे पाटील यांचे बंधू प्रवरा आरोग्य अभिमात विद्यापीठाचे कुलपती डॉक्टर राजेंद्र विखे पाटील यांनी देखील शक्ती प्रदर्शन करत अपक्ष म्हणून उमेदवारी अर्ज दाखल केलेला आहे. कोल्हे व विखे हे दोन्ही उमेदवार भाजपकडून उमेदवारी मिळावी यासाठी प्रयत्नशील आहे. महाविकास आघाडीचे उमेदवार ॲड. संदीप गुळवे आज शक्तिप्रदर्शन करत आपला उमेदवारी अर्ज दाखल करतील.
