शनिवार, दिनांक ८ जून २०२४
संगमनेर शहरातील बेकायदा कत्तलखान्याचे नेटवर्क आता तालुक्याच्या ग्रामीण भागात हातपाय पसरू लागले आहे. शुक्रवारी रात्री साडेदहा वाजण्याच्या सुमारास संगमनेर तालुका पोलिसांनी केलेल्या कारवाईत कत्तलीच्या उद्देशाने बांधून ठेवलेल्या गोवंश जातीच्या ११ वासरांची सुटका करण्यात आली आहे.
संगमनेर तालुक्यातील कौठे धांदरफळ येथे ही कारवाई करण्यात आली असून याप्रकरणी महिला पोलीस कॉन्स्टेबल वनिता चोखंडे यांनी दिलेल्या फिर्यादीवरून संतोष गंगाधर घुले आणि इम्तियाज मोमीन या दोघांविरुद्ध तालुका पोलीस ठाण्यात गुन्हा दाखल करण्यात आला आहे. गोरक्षक अविनाश शहा यांच्या मदतीने ही कारवाई करण्यात आल्याची माहिती मिळते.
कौठे धांदरफळ (संगमनेर) येथे संतोष गंगाधर घुले याच्या घरासमोर गोवंश जातीची वासरं कत्तलीच्या उद्देशाने बांधून ठेवल्याची माहिती पोलिसांना मिळाली होती. त्यामुळे पोलिसांचे पथक घटनास्थळी गेले असता अंधाराचा फायदा घेऊन तेथे असलेला इसम तेथून पसार झाला. घटनास्थळी पोलीस पथकाला निर्दयतेने कत्तलीच्या उद्देशाने चारापाणी न देता बांधून ठेवलेली उंबाळे मारत असलेल्या अवस्थेत वासरे आढळून आली.
पोलीस चौकशी दरम्यान पळून गेलेल्या इसमाचे नाव संतोष गंगाधर घुले असल्याचे निष्पन्न झाले त्याने इम्तियाज मोमीन यांच्या मदतीने मी वासरे कत्तलीच्या उद्देशाने बांधून ठेवली होती. पोलिसांनी वासरांची सुटका करत त्यांना गोशाळेत पाठविले आहे.
याप्रकरणी तालुका पोलीस ठाण्यात दोघांविरोधात गुन्हा दाखल करण्यात आला असून पुढील तपास पोलीस हेड कॉन्स्टेबल राजेंद्र पालवे करत आहे.
