शनिवार दिनांक ८ जून २०२४
संसदेच्या विरोधी पक्षनेतेपदी राहुल गांधी यांच्या नावावर शिक्कामोर्तब करण्यात आले आहे. काँग्रेसच्या बैठकीत एकमताने राहुल गांधी यांच्याकडे विरोधी पक्षनेतेपद देण्याचा ठराव संमत करण्यात आला, अशी माहिती काँग्रेसचे प्रभारी सरचिटणीस के. सी. वेणुगोपाल यांनी दिली.
आज शनिवारी (ता. ०८ जून) दिल्लीत काँग्रेस कार्यकारणीची बैठक पार पडली. या बैठकीत ही निवड करण्यात आली. संसदेत विरोधी पक्षनेता म्हणून राहुल गांधीच नीट जबाबदारी पार पाडू शकतात, असेही वेणुगोपाल म्हणाले. राहुल गांधी यांनी सभागृहात काँग्रेसची धुरा सांभाळावी आणि लोकसभेतील विरोधी पक्षनेते व्हावे, अशी मागणी काँग्रेसमधील खासदारांनी आधीपासूनच केली आहे. त्यामुळे या संदर्भात झालेल्या काँग्रेसच्या बैठकीत यावर एकमताने निर्णय घेण्यात आला.
लोकसभा निवडणूक २०२४ मध्ये काँग्रेस पक्षाने देशभरात ९९ जागा जिंकल्या आहेत. त्यामुळे आता विरोधी पक्षातही काँग्रेसच बसणार आहे. त्यामुळे संसदेतील विरोधी पक्षनेतेपदाची धुरा कोणाच्या खांद्यावर द्यावी, याबाबत आज काँग्रेस अध्यक्ष मल्लिकार्जुन खरगे यांच्या अध्यक्षतेखाली बैठक पार पडली.
विस्तारित कार्य समितीच्या बैठकीत पक्षाच्या संसदीय पक्षाच्या प्रमुख सोनिया गांधी, पक्षाचे माजी अध्यक्ष राहुल गांधी, सरचिटणीस प्रियांका गांधी वड्रा, संघटनेचे सरचिटणीस के. सी. वेणुगोपाल आणि कार्यकारिणीचे वरिष्ठ नेते उपस्थित होते.
