रविवार, दिनांक ९ जून २०२४
तक्रारदाराच्या शेताच्या पांदण रस्त्याचे काम करून घेण्यासाठी, काम झाल्यावर बिल मंजूर करण्याकरिता मदत करण्यासाठी व रस्त्याच्या कामात कोणतेही अडचण न येण्यासाठी तब्बल दीड लाख रुपये लाचेची मागणी करत त्यापैकी ७५ हजार रुपयांचा पहिला हप्ता स्वीकारताना लाच लुचपत विभागाच्या अधिकाऱ्यांनी एका दुकानदाराला ताब्यात घेतले.
सरपंच, उपसरपंचासह याप्रकरणी यवतमाळमध्ये पाच जणांविरुद्ध गुन्हा दाखल करण्यात आला असून वरुडखेड पिंपळगाव (यवतमाळ) ग्रामपंचायतचे सरपंच निलेश प्रकाश राऊत, उपसरपंच गजानन तुळशीराम मनवर यांच्यासह खासगी इसम रमेश आनंदराव कुटे पाटील, मुकुल घनश्याम राऊत व घनश्याम बाबाराव राऊत असे गुन्हा दाखल झालेल्या आरोपींची नावे आहेत.
लाचेची रक्कम सरपंच निलेश राऊत यांना देण्यासाठी तक्रारदार गेले असता सरपंच राऊत यांनी लाचेच्या दीड लाखापैकी पहिल्या टप्प्यातील ७५ हजार रुपये मुकुल घनश्याम राऊत यांच्या बोधेगाव येथील गौरी हार्डवेअरमध्ये ठेवण्यास सांगितले होते. तेथे मुकुल राऊत यांनी सरपंच राऊत यांच्या सांगण्यावरून सदरची रक्कम स्वीकारताना लाचलूचपत विभागाच्या अधिकाऱ्यांनी शनिवारी पकडले.
याप्रकरणी यवतमाळ लाच लुचपतच्या अधिकाऱ्यांनी पोलीस ठाण्यात सरपंच उपसरपंच या लोकसेवकांसह तीन खाजगी व्यक्तीविरुद्ध भ्रष्टाचार प्रतिबंधक अधिनियम १९८८ च्या कलम ७, १२ नुसार गुन्हा दाखल केला आहे.
