सोमवार, दिनांक १० जून २०२४
साखरपट्ट्यात अवैधरित्या गर्भलिंग निदान करत मुलींना गर्भातच मारून टाकण्याचे प्रकार समोर आले असतानाच आता अवैधरित्या गर्भलिंग निदान केल्याप्रकरणी एका डॉक्टरसह खाजगी व्यक्तीवर बारामतीत गुन्हा दाखल करण्यात आला आहे.
बारामती उपजिल्हा रुग्णालयाचे प्रभारी वैद्यकीय अधीक्षक डॉ. महेश सोपानराव जगताप यांनी दिलेल्या फिर्यादीवरून गुन्हा दाखल करण्यात आला असून डॉ. मधुकर चंद्रकांत शिंदे (रा. लक्ष्मीनगर, फलटण) आणि नितीन बाळासाहेब घुले (रा. ढेकळवाडी, बारामती) असे गुन्हा दाखल झालेल्या दोघा आरोपींची नावे आहेत.
डॉ. जगताप यांनी आपल्या फिर्यादीमध्ये म्हटले आहे की, बारामती शहर पोलीस ठाण्याचे पोलीस उपनिरीक्षक यांना बारामती परिसरात एक डॉक्टर गर्भलिंग निदान चाचणी करण्याकरिता आल्याची माहिती मिळाली होती. अशा प्रकारचा कोणी चाचणी करताना आढळल्यास आम्हाला कळविण्याचे सूचित केले होते. त्यानंतर सायंकाळी सहा वाजण्याच्या सुमारास घोडके यांना सदर व्यक्ती व त्याच्यासोबत आणखी एक जण मळद परिसरात सोनोग्राफी मशीनसह आढळून आले असल्याची माहिती दिली.
त्यामुळे या संदर्भात माहिती घेण्यासाठी घटनास्थळी गेलो असता तिथे गर्भलिंग करण्यासाठी आलेल्या डॉक्टरचे नाव मधुकर चंद्रकांत शिंदे (रा. लक्ष्मीनगर, फलटण, जि. सातारा) व त्याच्यासोबतच्या व्यक्तीचे नाव नितीन बाळासाहेब घुले (रा. ढेकळवाडी, बारामती) असल्याचे निष्पन्न झाले. त्यांच्याकडे गर्भलिंग निदान चाचणीसाठी वापरण्यात येणारे मशीन काळ्या रंगाच्या बॅगमध्ये आढळून आले.
दोन्ही आरोपींनी माळेगाव येथे गोफणे वस्ती नजीक बांधकाम चालू असलेल्या ठिकाणी एका महिलेचे गर्भलिंग निदान चाचणी केली असल्याचे चौकशीअंती आढळून आले. या प्रकरणी माळेगाव पोलीस ठाणे येथे गुन्हा दाखल करण्यात आला असून पोलीस निरीक्षक बालाजी भांगे पुढील तपास करत आहे.
