बुधवार दिनांक १२ जून २०२४
जमिनीच्या खरेदी व्यवहारापोटी शिवसेनेच्या शहरप्रमुखांकडून २५ लाख रुपये घेऊन त्या बदल्यात करून दिलेले साठेखत रद्द न करता अथवा घेतलेले पैसे परत न देता त्याच जमिनीची परस्पर दुसऱ्याला विक्री करत फसवणूक केल्याची तक्रार मुख्यमंत्री एकनाथ शिंदेंच्या शिवसेनेचे शहर प्रमुख दिलीप सातपुते (वय ४९ वर्ष, रा. भूषणनगर, केडगाव, अहमदनगर) यांनी पोलीस ठाण्यात दिली आहे.
सातपुते यांच्या तक्रारीवरून नगरच्या कोतवाली पोलीस ठाण्यात अंकुशराव जयवंतराव नागरे, जालिंदर जयवंतराव नागरे, गजेंद्र बाळासाहेब नागरे, शांताबाई बाळासाहेब नागरे, कविता संजय फुंदे व राजकुमार अंकुशराव नागरे (सर्व रा. संगम जळगाव, ता. गेवराई, जि. बीड) यांच्या विरोधात फसवणुकीचा गुन्हा दाखल करण्यात आला आहे.
आरोपींचे नगर तालुक्यातील कामरगाव येथे गट नंबर ६९६ मध्ये १९ एकर शेत जमीन असून ही जमीन आरोपींनी सातपुते यांना विक्री केली होती. या व्यवहारापोटी आरोपींनी फिर्यादी सातपुते यांच्याकडून २५ लाख रुपये घेत त्यांना या जमिनीचे साठेखत करून दिले होते.
त्यानंतर आरोपींनी सातपुते यांना करून दिलेले साठेखत रद्द न करता अथवा त्यांच्याकडून घेतलेले २५ लाख रुपये त्यांना परत न करता या जमिनीची परस्पर विक्री केली असल्याचे फिर्यादीत म्हटले आहे. पोलिसांनी सहा जणांविरुद्ध या प्रकरणी भारतीय दंड विधानसभेचे कलम ४२०, ४०६ प्रमाणे गुन्हा दाखल केला असून पुढील तपास महिला सहाय्यक पोलीस निरीक्षक श्रीवास्तव करत आहे.
