गुरुवार दिनांक १३ जून २०२४
गुन्ह्यात जप्त करण्यात आलेली इर्टिका कार सोडून देण्याच्या बदल्यात दहा हजार रुपयांची लाच घेताना पोलीस उपनिरीक्षक लाच लुचपत प्रतिबंधक विभागाच्या जाळ्यात अडकला. यामुळे पोलीस दलात खळबळ उडाली आहे.
कैलास विश्वनाथ ठाकूर (वय ५६ वर्ष) असे लाचखोर पोलीस उपनिरीक्षकाचे नाव असून तो जळगाव जिल्ह्यात रावेर तालुक्यातील निंभोरा पोलीस ठाण्यात कार्यरत आहे. याप्रकरणी निंभोरा पोलीस ठाण्यात गुन्हा दाखल करण्यात आला आहे.
यासंदर्भात लाच लुचपत विभागाकडून देण्यात आलेली माहिती अशी, तक्रारदाराविरुद्ध निंभोरा पोलीस ठाण्यात गुन्हा दाखल असून या गुन्ह्यामध्ये तक्रारदाराची इर्टिका कार जप्त करण्यात आली आहे. जप्त करण्यात आलेली कार सोडून देण्यासाठी पोलीस उपनिरीक्षक ठाकूर याने प्रथमत: पंधरा हजार रुपयांची लाच मागितली होती. त्यामुळे तक्रारदाराने जळगाव लाच लुचपत विभागाकडे या संदर्भात तक्रार नोंदवली.
लाचलुचपत विभागाच्यावतीने तक्रारदाराच्या तक्रारीची पंचांसमोर पडताळणी केली असता उपनिरीक्षक ठाकूर याने सुरुवातीला पंधरा हजार तर नंतर तडजोडीअंती दहा हजार रुपये लाचेची मागणी केली होती. त्यानंतर बुधवारी लाचखोर पोलीस उपनिरीक्षकाला पकडण्यासाठी सापळा लावण्यात आला. ज्यावेळी तक्रारदाराकडून दहा हजार रुपये लाच स्वीकारताना पोलीस उपनिरीक्षकाला रंगेहात पकडण्यात आले.
पोलीस उपनिरीक्षक ठाकूर यांच्याविरुद्ध जळगाव जिल्ह्यातील निंभोरा पोलीस ठाण्यात गुन्हा दाखल करण्यात आला आहे.
