गुरुवार दिनांक १३ जून २०२४
नाशिक शिक्षक लोकसभा मतदारसंघासाठी निवडणूक लढविणाऱ्या उमेदवाराची अंतिम यादी जाहीर झाली आहे. नाशिकच्या जागेसाठी तब्बल २१ उमेदवार मैदानात उतरले आहे. त्यातच महायुतीत अजित पवार गटाकडून बंडखोरी झाल्याने आता ही निवडणूक चौरंगी बनली आहे.
महायुती सरकारमधील महसूल मंत्री राधाकृष्ण विखे पाटील यांनी माघारीच्या अंतिम दिवशी नाशिकमध्ये येऊन विनंती केल्यानंतर त्यांचे बंधू प्रवरा अभिमत विद्यापीठाचे डॉ. राजेंद्र विखे यांनी माघार घेतली. याच दरम्यान काँग्रेसचे दिलीप पाटील आणि भाजप इच्छुक धनराज विसपुते यांनीही माघार घेतली. मात्र अजीत पवार गटाचे महेंद्र भावसार यांनी उमेदवारी कायम ठेवल्याने महायुतीत बंडखोरीचे वारे कायम आहे.
असे असले तरी नाशिकमध्ये शिंदे सेनेचे किशोर दराडे, उद्धव सेनेचे ॲड. संदीप गुळवे, अपक्ष उमेदवार विवेक कोल्हे आणि महेंद्र भावसार यांच्यात चौरंगी लढत होण्याची चिन्हे आहेत. भावसार यांची बंडखोरी थांबविण्यात अजित पवार गटाला अपयश आले. त्याचा फटका महायुतीचे उमेदवार किशोर दराडे यांना बसण्याची चिन्हे आहेत.
याशिवाय या मतदारसंघात नगर मधून भाजपाचे दिग्गज नेते विवेक कोल्हे यांनी देखील आपला अपक्ष उमेदवारी अर्ज कायम ठेवल्याने दराडे यांच्या समोरील अडचणीत जास्तच वाढ झाली आहे. यांच्या उमेदवारीमुळे या मतदारसंघातील गणित बिघडण्याची चिन्हे आहेत.
विशेष म्हणजे डॉ. राजेंद्र विखे पाटील यांनी निवडणुकीतून माघार घेतल्याने आता नगरमधून ते एकमेव प्रबळ दावेदार उरले आहे. त्यामुळे जिल्ह्यातील बहुतांशी मतदारांची मते त्यांच्या पारड्यात जातील असे चित्र आहे. होणाऱ्या चौरंगी लढतीत नेमकं काय घडेल हे आज तरी स्पष्ट सांगता येत नाही.
नाशिक विभाग शिक्षक मतदार संघाच्या निवडणुकीत चुरस निर्माण झाली असून मतदार कोणाला कौल देतात हे निवडणुकीनंतर समोर येणार आहे.
