शनिवार दिनांक १५ जून २०२४
संगमनेर शहरालगच्या कासारवाडी गावच्या शिवारात एका तीस वर्षीय महिलेचा मृतदेह संशयास्पद स्थितीत आढळून आला आहे. दरम्यान मृत महिलेची ओळख पटली असून तिचा घातपात असल्याचा संशय नातेवाईकांनी व्यक्त केला आहे.
रंजना भिकाजी खेमनर (रा. अंभोरे, ता. संगमनेर) असे या मृतावस्थेत आढळलेल्या विवाहित महिलेचे नाव आहे. या घटनेमुळे शहरात खळबळ उडाली आहे.
मृतावस्थेत आढळून आलेली रंजना खेमनर ही महिला आपल्या सासूच्या डोळ्याचे ऑपरेशन करण्यासाठी तिच्या समवेत संगमनेरमध्ये आली होती. सासूसाठी जेवणाचा डबा आणण्याकरिता ती शुक्रवारी सायंकाळी साडेसात वाजण्याच्या सुमारास रुग्णालयातून बाहेर पडली होती. रात्री उशिरा तिचा मृतदेह शहरालगतच्या कासारवाडी शिवारात आढळून आला.
रुग्णालयात सासू जवळ विवाहिता नसल्याने नातेवाईकांनी तिचा शोध घेतला असता ती मृत अवस्थेत नातेवाईक व पोलिसांना आढळून आली. या महिलेच्या शरीरावर मारहाणीच्या जखमा आढळून आल्या असून घटनास्थळी रस्त्यावर हातातील बांगड्या आणि रक्त आढळून आले आहे. त्यामुळे हा सर्व प्रकार संशयास्पद असल्याने तिचा घातपात झाल्याचा संशय नातेवाईकांनी व्यक्त करत गुन्हा दाखल करण्याची मागणी केली.
दरम्यान शहर पोलीस ठाण्याचे पोलीस निरीक्षक भगवान मथुरे, उपनिरीक्षक निवांत जाधव, पोलीस कॉन्स्टेबल राहुल सारबंदे व राहुल डोके यांनी नातेवाईकांची समजूत काढत उत्तरीय तपासणीचा अहवाल आल्यानंतर योग्य तो गुन्हा दाखल करण्याचे आश्वासन नातेवाईकांना दिले. पुढील उत्तरीय तपासणीसाठी या महिलेचा मृतदेह लोणीच्या प्रवरा रुग्णालयात नेण्यात आला. दरम्यान ही विवाहिता रुग्णालयातून कासारवाडी गावच्या शिवारात कशी गेली, तिचा घातपात झाला की अपघात याचा तपास आता पोलिसांना करावा लागणार आहे.
