विशेष प्रतिनिधी / मुंबई
लोकसभा निवडणुकीत राज्यातील जनतेने दाखविलेला विश्वास सार्थकी नेण्यासाठी पुढे येणाऱ्या निवडणुकीसाठी एकत्रितपणे सामोरं जाण्याचा निर्णय महाविकास आघाडीतील तिन्ही घटक पक्षानी घेतला आहे. या निर्णयाची घोषणा आघाडीच्या नेत्यांनी शनिवारी मुंबईत सयुक्त पत्रकार परिषदेत केली.
लोकसभा निवडणुकीप्रमाणे विधानसभेतही निश्चितच परिवर्तन होईल असा दावा घटक पक्षाच्या नेत्यांनी केला आहे. मुंबईत यशवंतराव चव्हाण प्रतिष्ठानमध्ये संयुक्त पत्रकार परिषदेत उद्धव ठाकरे, राष्ट्रवादी काँग्रेस शदरचंद्र पवार पक्षाचे अध्यक्ष शरद पवार तसंच काँग्रेसचे नेते पृथ्वीराज चव्हाण उपस्थित होते.
पत्रकार परिषदेत काय म्हणाले नेते …
उद्धव ठाकरे म्हणाले – राज्यातील जनतेचे आभार मानले. देशातील जनता आता जागी झाली आहे. त्यांना खरेपणा, खोटेपणा यातला फरक कळतो. राज्यातील जनतेनं अत्यंत विश्वासाने महाविकास आघाडीला मतदान केलं. हे मतदान लोकशाही वाचवण्यासाठी, संविधान वाचवण्यासाठी आहे. आम्ही या मतांसह जनतेचा आदर करतो. ही लढाई अंतिम नाही, आता विधानसभा हे आमचं आगामी लक्ष्य आहे. विधानसभा निवडणूक आम्ही तिन्ही पक्ष तसंच आमचे घटक पक्ष एकत्र मिळून लढवणार आहोत. मराठी माणसांनी आम्हाला मतदान केलंच आणि लोकशाही वाचावी या विश्वासापोटी सर्व धर्मीयांनी आम्हाला मतदान केलं. त्यामुळं सर्व धर्मीय जनतेचे आम्ही आभारी आहोत.
भाजपने या निवडणुकीत अनेक नरेटीव्ह सेट करण्याचा प्रयत्न केला. त्यांनी निवडणूक प्रचारात जनतेची दिशाभूल करण्याचा प्रयत्न केला. पण, जनता त्याला बळी पडली नाही. शिवसेना पक्ष सोडून गेलेल्या गद्दारांना परत घेणार नाही. तसंच अमोल कीर्तिकर यांच्या मतदार संघात निवडणुकीत झालेल्या गैरप्रकाराबाबत याचिका दाखल केली आहे. महिनाभरात त्याचा निर्णय अपेक्षित आहे.
शरद पवार म्हणाले, राज्यातील जनतेने महाविकास आघाडीला दिलेला कौल आहे, तो आम्ही स्वीकारला आहे. आता आम्ही नव्याने विधानसभेची तयारी करतोय. अजित पवार यांच्याबाबत संघाचे मुखपत्र असलेल्या ऑर्गनायझरमध्ये काही अनुभव छापून आले आहेत. त्याबाबत अधिक काही बोलायला नको. मात्र, अजित पवारांची पुन्हा घरवापसी होणार नाही. जनतेने लोकशाही वाचवण्यासाठी दाखवलेल्या सजगतेबद्दल त्यांचे आभार मानावे तितके थोडेच आहेत. जनतेचे आशीर्वाद महाविकास आघाडीसोबत यापुढेही निश्चितच राहतील.
पृथ्वीराज चव्हाण म्हणाले, राज्यात येत्या विधानसभा निवडणुकीत नक्कीच परिवर्तन होईल.
