सोमवार, १७ जून २०२४
संगमनेर शहर पोलिसांनी दागिने चोरीच्या गुन्ह्यातील हस्तगत केलेले दागिने फिर्यादी महिलेस परत करण्यात आले आहे. चोरी गेलेले दागिने परत मिळाल्याने महिलेच्या चेहऱ्यावर आनंद निर्माण झाला होता.
संगमनेर शहरात दागिने चोरीच्या घटना वारंवार घडत आहे. दागिने चोरांना पकडण्याचे मोठे आव्हान शहर पोलिसांसमोर आहे. आशा स्थितीतही दिलासादायक घटना समोर आली आहे.
संगमनेर पोलिसांनी पकडलेल्या आरोपीकडून या गुन्ह्यातील सोने हस्तगत केले होते. तांत्रिक विश्लेषणाच्या आधारे हस्तगत केलेला मुद्देमालातील चार तोळ्याचे सोन्याचे दागिने तक्रारदार महिलेचे असल्याचे तपासात निष्पन्न झाल्याने ते संबंधित महिलेला पोलीस निरीक्षक भगवान मथुरे यांच्या हस्ते शहर पोलिसांनी परत केले आहे.
संगमनेरचे पोलीस उपअधीक्षक सोमनाथ वाघचौरे यांच्या मार्गदर्शनाखाली पोलीस निरीक्षक भगवान नागरे यांच्या सूचनेवरून पोलीस उपनिरीक्षक निवांत जाधव, सहाय्यक फौजदार रावसाहेब लोखंडे, पोलीस कॉन्स्टेबल शशिकांत दाभाडे, पोलीस कॉन्स्टेबल राहुल डोके, पोलीस कॉन्स्टेबल राहुल सारबंदे यांच्यासह अप्पर पोलीस अधीक्षक सचिन धनाड, आकाश बहिरट यांनी दागिने हस्तगत करण्याची कामगिरी केली होती.
