सोमवार, १७ जून २०२४
लोकसभा निवडणुकीत राज्यात झालेल्या मोठ्या पराभवानंतर महाराष्ट्र भाजपमध्ये फेरबदलाचे संकेत मिळत असतानाच आता आगामी विधानसभा निवडणुकीच्या पार्श्वभूमीवर भारतीय जनता पक्षाकडून महाराष्ट्र राज्याच्या प्रभारीपदी केंद्रीय मंत्री भूपेंद्र यादव आणि सहकारी म्हणून केंद्रीय मंत्री अश्विनी वैष्णव यांची नियुक्ती करण्यात आली आहे.
लोकसभा निवडणुकीनंतर आता भाजपने विधानसभा निवडणुकीची तयारी सुरू केली असून सोमवारी (ता. १७) भाजपकडून महाराष्ट्रासह हरियाणा, झारखंड आणि जम्मू काश्मीर विधानसभेसाठी प्रभारी व सह प्रभारींच्या नियुक्ती केली आहे. संघटनात्मक पातळीवर देखील निवडणुकानंतर फेरबदलाचे संकेत मिळत होते. नव्या प्रभारींच्या नियुक्तीमुळे फेरबदलास प्रारंभ झाला असल्याचे बोलले जाते. भाजपाचे प्रदेशाध्यक्ष आणि मुंबई अध्यक्ष देखील बदलले जाण्याची शक्यता वर्तवली जात आहे.
चार राज्यांसाठी भाजपचे राष्ट्रीय अध्यक्ष जे. पी. नड्डा यांच्या आदेशावरून प्रभारी, सहप्रभारी नियुक्त करण्यात आले आहे.
महाराष्ट्रासाठी निवडणूक प्रभारीपदी केंद्रीय मंत्री भूपेंद्र यादव, सहप्रभारी केंद्रीय मंत्री अश्विनी वैष्णव यांची, हरियाणाच्या निवडणूक प्रभारीपदी केंद्रीय मंत्री धर्मेंद्र प्रधान व सहप्रभारीपदी माजी मुख्यमंत्री विप्लवकुमार देव यांची, झारखंडच्या निवडणूक प्रभारीपदी केंद्रीय मंत्री शिवराज सिंह चौहाण व सहप्रभारीपदी मुख्यमंत्री हिंमता विश्व सरमा यांची तर जम्मू काश्मीरच्या प्रभारी पदी केंद्रीय मंत्री किशन रेड्डी यांच्या नियुक्ती करण्यात आल्या आहे.
२०२४ च्या लोकसभा निवडणुकीत राज्यात भाजपला अपेक्षित यश मिळालं नाही. उत्तरप्रदेश तसेच महाराष्ट्रात भाजपच्या सर्वाधिक जागा घटल्या. त्यामुळे भाजपला केंद्रात युतीचं सरकार बनवावं लागलं. महाराष्ट्रात ऑक्टोबर महिन्यात विधानसभा निवडणुका होण्याची शक्यता आहे. या निवडणुकीत चांगली कामगिरी करण्याचा भाजपाचा प्रयत्न असेल.
