बुधवार, १९ जून
छगन भुजबळ एकेकाळी शिवसेनेत होते. त्याला बराच काळ उलटला. त्यानंतर छगन भुजबळ काँग्रेसमध्ये, पाठोपाठ राष्ट्रवादी काँग्रेसमध्ये गेले आणि आता अजितदादा गटात आहेत. त्यांच्या राजकीय प्रवासात शिवसेनेचे वळण बरेच मागे पडले आहे. त्यामुळे आपण बोलताय त्या अफवेत तथ्य नाही. छगन भुजबळ यांच्याशी शिवसेनेचा कोणताही राजकीय संवाद झालेला नाही, तो होण्याची शक्यता नाही. कारण भुजबळांनी स्वत:चा मार्ग निवडला आहे, अशा स्पष्ट शब्दात शिवसेना नेते खासदार संजय राऊत यांनी शिवसेना प्रवेशाला पूर्णविराम दिला.
बुधवारी मुंबईत झालेल्या पत्रकार परिषदेत ठाकरे गटाचे नेते संजय राऊत बोलत होते. लोकसभेसाठी नाशिकमधून व त्या पाठोपाठ राज्यसभा निवडणूक लढविण्याची इच्छा असूनही संधी न मिळाल्यामुळे नाराज असलेले राष्ट्रवादी काँग्रेसचे अजित पवार गटाचे नेते छगन भुजबळ हे उद्धव बाळासाहेब ठाकरे यांच्या शिवसेनेत प्रवेश करणार असल्याच्या चर्चा राजकीय वर्तुळात सुरू असतानाच याप्रकरणी शिवसेना नेते खासदार संजय राऊत यांनी महत्त्वाचे विधान केले आहे.
राऊत म्हणाले, छगन भुजबळ आणि शिवसेनेचा आता कोणताही संबंध नाही. छगन भुजबळ आणि शिवसेनेत बोलणी सुरु आहेत, अशा अफवा राजकीय संभ्रम निर्माण करण्यासाठी पसरवल्या जात आहेत. मात्र, यामध्ये कोणतेही तथ्य नाही. त्यांच्या आताच्या भूमिकांशी शिवसेनेच्या भूमिका मेळ खाणार नाहीत. ते शिवसेनेत येणार अशा बातम्या उडवून महाराष्ट्रात गोंधळ उडवला जात आहे. पण छगन भुजबळ यांना शिवसेनेचा कोणताही नेता भेटलेला नाही, भेटणारही नाही, असे संजय राऊत यांनी सांगितले.
