बुधवार, ३१ जुलै
गुन्ह्यातील सहभागाबद्दल स्वतंत्र असा सबळ पुरावा पोलिसांनी उपलब्ध न केल्याने संगमनेरमधील एका खून प्रकरणात अटकेत असलेल्या आरोपीला तब्बल दोन महिन्यानंतर जिल्हा व अतिरिक्त सत्र न्यायाधीश वाय. पी. मनाठकर यांनी जामीन मंजूर केला आहे.
मोहम्मद इम्रान निसार सिद्दिकी असे न्यायालयाने जामीन मंजूर केलेल्या आरोपीचे नाव आहे. गेल्या आठवड्यात न्यायालयाने हा जामीन मंजूर केल्याची माहिती समोर आली. संशयित आरोपी मोहम्मद इम्रान निसार सिद्दिकी याच्या विरोधात आहतेशाम अन्सारी यांच्या खुनाचा आरोप असून त्याच्या विरोधात संगमनेर शहर पोलीस ठाण्यात भारतीय दंड संहिता कलम ३०२, १२०बी, २०१, ५०६ सह ३४ नुसार गुन्हा दाखल आहे.
२४ एप्रिलला संगमनेर शहरालगत असलेल्या मालदाड येथील जंगलात अनोळखी व्यक्तीचे प्रेत आढळून आले होते. तपासाअंती आढळून आलेला मृतदेह हा संगमनेर शहरातील आहतेशाम अन्सारी यांचा असल्याचे समोर आले होते. या संदर्भात संगमनेर शहर पोलीस ठाण्यात सुरुवातीला अकस्मात मृत्यूची नोंद करण्यात आली होती.
त्यानंतर मृत आहतेशाम अन्सारी यांच्या मुलाने शहर पोलीस ठाण्यात दिलेल्या फिर्यादीवरून मौलाना मोहम्मद जाहीर मोहम्मद युनूस मुलतानी, मोहम्मद इम्रान निसार सिद्दिकी व मोहम्मद फैजान शमोम अन्सारी या तिघांविरोधात खुनाचा गुन्हा दाखल करण्यात आला होता.
पोलीस तपासा दरम्यान हा घातपाताचा प्रकार असल्याचे समोर आले. तब्बल महिनाभरानंतर पोलिसांनी हे खून प्रकरण उजेडात आणत मौलाना मोहम्मद जाहीर मोहम्मद युनूस मुलतानी व मोहम्मद इम्रान निसार सिद्दिकी या दोघांना अटक केली तर तिसरा आरोपी अद्यापही फरार असून दोन्ही आरोपी दोन महिन्यांपासून अटकेत आहे.
उत्तर प्रदेशच्या सहारानपुर येथून संगमनेरमध्ये आलेल्या आरोपी मौलाना मोहम्मद जाहीर मोहम्मद युनूस मुलतानी हा मृत आहतेशाम अन्सारी यांच्या बरोबरच राहत होता. त्याला फिर्यादीच्या बहिणीसोबत विवाह करायचा होता. त्यासाठी त्याने फिर्यादीच्या वडिलांकडे तसे बोलून दाखवले होते. या विवाहाला अन्सारी यांनी विरोध दाखविला. त्यामुळे आरोपीने नाराज होऊन फिर्यादीच्या वडिलांना ‘तुम्ही सरळ मार्गाने तुमच्या मुलीचे माझ्यासोबत लग्न लावले नाही तर माझ्याकडे दुसरा मार्ग आहे, मी तुम्हाला बरबाद करून टाकेल’, अशी धमकी दिली होती. त्यामुळे फिर्यादीच्या वडिलांनी त्याला घराच्या बाहेर काढले होते. यातून हे खून प्रकरण घडल्याचा संशय आहे.
अटकेत असलेल्या आरोपी मोहम्मद इम्रान निसार सिद्दिकी याने ॲड. शरीफ पठाण, ॲड. मोहसीन खान यांच्यामार्फत जिल्हा व अतिरिक्त सत्र न्यायालयात जामीन मिळण्यासाठी अर्ज दाखल केला होता. न्यायाधीश वाय. पी. मनाठकर यांच्यासमोर या अर्जाचे कामकाज चालले. आरोपीचे वकील पठाण यांनी फिर्यादीने संशयाच्या आधारे फिर्याद दिल्याचे सांगितले. अर्जदाराने संगणमत करून फिर्यादीच्या वडिलांचा खून केला याचा एकही स्वतंत्र पुरावा पोलिसांकडे उपलब्ध नसल्याचे सांगितले. मृतदेह २४ एप्रिलला आढळून आल्यानंतर २६ मे पर्यंत कोणतीही फिर्याद देण्यात आली नव्हती. अर्जदाराच्या ताब्यातून कोणतीही आक्षेपार्ह वस्तू जप्त करण्यात आलेली नाही. या बाबी न्यायालयाच्या निदर्शनास आणून देत जामीन मंजूर करण्याची मागणी केली. फिर्यादीच्या आणि सरकार पक्षाच्या युक्तिवाद विचारात घेत न्यायालयाने आरोपीला जामीन मंजूर केला आहे.
