सोमवार, ०५ ऑगस्ट
अज्ञात व्यक्तीने घराच्या पडवीत झोपलेल्या सत्तर वर्षे वयाच्या वृद्धाचा डोक्यात धारदार शस्त्राने घाव घालत खून केल्याचा प्रकार सोमवारी सकाळी समोर आला. साहेबराव भिमाजी उनवणे असे खून झालेल्या वृद्धाचे नाव आहे.
संगमनेर तालुक्यातील झोळे गावात ही घटना घडली असून या वृद्धाचा खून कोणी आणि कशासाठी केला याची उकल करण्याचे आव्हान संगमनेर पोलिसांसमोर निर्माण झाले आहे. साहेबराव उनवणे हे रविवारी रात्री नेहमीप्रमाणे जेवण करून घराबाहेर असलेल्या पडवीमध्ये झोपले होते. अज्ञात व्यक्तीने केलेल्या खुनाचा हा प्रकार सोमवारी सकाळी समोर आला.
सकाळी घराबाहेर आलेल्या उनवणे यांच्या सुनेला ते रक्ताच्या थारोळ्यात पडल्याचे दिसून आल्याने हा प्रकार लक्षात आल्यानंतर त्यांनी आरडाओरडा केला. उनवणे यांचा मुलगा दीपक याने घटनेची माहिती संगमनेर तालुका पोलिसांना कळविली.
त्यानंतर संगमनेरचे पोलीस उपअधीक्षक सोमनाथ वाघचौरे, तालुका पोलीस ठाण्याचे निरीक्षक देविदास ढुमणे यांच्यासह पोलीस पथक घटनास्थळी दाखल झाले. घटनास्थळाचा पंचनामा करण्यात आला असून घटनास्थळी संशयास्पद काही आढळून आले नसल्याचे पोलिसांनी सांगितले.
दरम्यान घटनास्थळी श्वानपथक बोलाविण्यात आले असून त्याबरोबरच फॉरेन्सिक टीमला देखील पाचारण करण्यात आले होते. या घटनेचा संपूर्णतः तपास केला जाईल, असे उपविभागीय पोलिस अधिकारी सोमनाथ वाघचौरे यांनी म्हटले आहे.
दरम्यान या संदर्भात संगमनेर तालुका पोलीस ठाण्यात दीपक साहेबराव उनवणे यांनी दिलेल्या फिर्यादीवरून गु.र.न. ४५०/२०२५ भारतीय न्याय संहिता २०२३ चे कलम १०३(१) नुसार अज्ञात आरोपी विरोधात जुना दाखल करण्यात आला असून पोलीस पुढील तपास करत आहे.
