बुधवार, १४ ऑगस्ट
वेतन फरकाची फाईल मंजूर करण्याच्या बदल्यात पाच हजार रुपयांची लाच स्वीकारताना आश्रम शाळेचे मुख्याध्यापक आणि शिपाई लाचेच्या सापळ्यात अडकले आहे. सिन्नरच्या रामनगर आश्रम शाळेत लाच लुचपत विभागाच्या अधिकाऱ्यांनी मंगळवारी ही कारवाई केली.
सुनिल वसंत पाटील (वय – ५४ वर्ष, मुख्याध्यापक, प्राथमिक आश्रमशाळा रामनगर ता. सिन्नर) आणि बाळू हिरामण निकम (वय ५५ वर्ष, शिपाई, प्राथमिक आश्रम शाळा, रामनगर, ता. सिन्नर, जिल्हा – नाशिक) अशी लाचखोर आरोपींची नावे असून दोघांनाही ताब्यात घेत त्यांच्या विरोधात गुन्हा दाखल करण्यात आला आहे.
लाच लुचपत विभागाकडे तक्रार करणाऱ्या तक्रारदाराच्या २०१६ ते २०२३ या दरम्यानच्या वेतन फरकाची फाईल मंजूर करून आणून फरकाची रक्कम काढून देण्याच्या मोबदल्यात मुख्याध्यापक सुनील पाटील यांनी तक्रारदाराकडे पाच हजार रुपये लाचेची मागणी केली होती.
पाटील यांनी आपल्या कार्यालयात असलेल्या शिपाई बाळू निकम याच्याकडे लाचेची रक्कम देण्यास सांगितली होती. त्यामुळे लाचेची रक्कम स्वीकारताना मंगळवारी (१३ ऑगस्ट) लाच लुचपत विभागाच्या अधिकाऱ्यांनी दोघांनाही रंगेहात पकडले. दोघांनाही ताब्यात घेत त्यांच्या विरोधात गुन्हा दाखल करण्यात आला आहे.
नाशिक लाच लुचपत प्रतिबंधक विभागाचे पोलीस निरीक्षक राजेंद्र सानप यांच्या नेतृत्वाखाली पोलीस हवालदार प्रफुल्ल माळी, पोलीस हवालदार संतोष गांगुर्डे, पोलीस नाईक विलास निकम यांनी ही कारवाई केली. पुढील तपास पोलीस निरीक्षक राजेंद्र सानप करत आहे.
