शुक्रवार, १६ ऑगस्ट
चिंचोली गुरव ते पारेगाव बुद्रुक रस्त्यावर मोटार सायकलवरून गुटखा वाहतूक करणाऱ्या दोघांना तीन गोण्या गुटख्यासह पकडले. पोलिसांनी दुचाकीवरून वाहतूक होत असलेला ऐंशी हजार रुपयांचा गुटखा पकडल्याची माहिती समोर येतात संगमनेरमधील गुटखा किंग विजय भागवत हा फरार झाल्याची माहिती पोलिसांनी दिले आहे.
संगमनेरमध्ये कायद्याचे उल्लंघन करत गुटखा विक्री मोठ्या प्रमाणात सुरू असते. शहर पोलीस ठाण्याच्या हद्दीत असलेल्या इंदिरानगरमधील (संगमनेर) विजय भागवत या गुटका किंगवर अन्न औषध प्रशासनाच्या अधिकाऱ्यांसह पोलीस मेहरबान असल्याचे आरोप वारंवार होत असतात. मात्र या तस्कराकडून मोठा मलिदा मिळत असल्याने संबंधित यंत्रणेचे कारवाईबाबत नेहमी कानावर हात असतात.
सोमवारी स्वातंत्र्यदिनी संगमनेर तालुका पोलिसांना चिंचोली गुरव ते पारेगाव बुद्रुक रस्त्यावरून आपल्या दुचाकीवर दोन इसम गुटख्याची वाहतूक करत असल्याची माहिती मिळाली होती. त्यामुळे तालुका पोलिसांनी मिळालेल्या माहितीच्या आधारे संशयित दुचाकी पकडले असता या दुचाकी वरील तीन गोण्यांमधून सुमारे लाखभर रुपयांचा गुटखा ताब्यात घेण्यात आला आहे.
तर समीर ज्ञानेश्वर सोनवणे (वय २५ वर्ष) व ऋषिकेश शिवाजी सोनवणे (वय २५ वर्षे दोघे रा. वेल्हाळे, तालुका संगमनेर) या दोघांना गुटखा वाहतूक करताना पोलिसांनी पकडले. पोलीस चौकशी दरम्यान त्यांनी हा गुटखा संगमनेरमधील गुटखा विक्रेता विजय भागवत यांच्याकडून घेतल्याची कबुली दिली आहे. त्यामुळे संगमनेर तालुका पोलिसांनी या दोघा आरोपींसह गुटका किंग विजय भागवत यांच्या विरोधात गुन्हा दाखल केला आहे.
दरम्यान गुन्हा दाखल झाल्याची कुणकुण लागताच गुटखा किंग विजय भागवत हा फरार झाला. पोलिसांनी संबंधित आरोपीकडून २४ हजार रुपये किमतीचा हिरा पान मसाला, ६ हजार रुपये किमतीची एक गोणी रॉयल ७१७ तंबाखू, ५० हजार रुपये किमतीचे दुचाकी असा ८० हजार रुपयांचा गुटखा सदृश मुद्देमाल ताब्यात घेतला आहे. या कारवाईमुळे गुटखा विक्रेत्यांमध्ये खळबळ उडाली आहे.
