बुधवार, २१ ऑगस्ट
मुरूम उत्खननासंदर्भात पोलीस ठाण्यात दाखल असलेल्या तक्रारदाराच्या नातेवाईक व इतरांविरुद्ध गुन्ह्यात पंचनाम्यात तक्रारदाराला लाभ मिळवून देण्यासाठी पंचा समक्ष दोन लाख रुपये लाचेची मागणी करणाऱ्या मंडळ अधिकाऱ्याला एक लाख रुपयांचा पहिला हप्ता स्वीकारताना जिल्हाधिकारी कार्यालयाच्या समोर एसीबीने रंगेहात पकडले आहे.
सचिन भागवत सानप (वय ३९ वर्ष) रा. एमएसजी अपार्टमेंट, फ्लॅट क्रमांक चार जुना नगर नाका, बीड असे बीडच्या लाचखोर मंडल अधिकाऱ्याचे नाव आहे. लाचखोर सानप याला लाच लचकत च्या अधिकाऱ्यांनी ताब्यात घेतले असून शिवाजीनगर (बीड) पोलीस ठाण्यात गुन्हा दाखल करण्याची प्रक्रिया सुरू आहे.
लाच लुचपतकडे तक्रार करणाऱ्या तक्रारदाराच्या नातेवाईक व इतरांविरुद्ध पिंपळनेर पोलीस ठाण्यात मुरूम उत्खननासंदर्भात गुन्हा दाखल असून या गुन्ह्या संदर्भाने मंडल अधिकारी सचिन सानप यांनी बीड तरफ खोड सज्जा अंतर्गत मोची पिंपळगाव येथील गट क्रमांक ४९ मधील मुरूम उत्खनन जागेचा पंचनामा केला होता.
नमूद पंचनाम्यात १००० ब्रासाऐवजी ५०० ब्रास उत्खनन दाखवून तक्रारदाराला लाभ मिळवून देण्यासाठी सानप यांनी तक्रारदाराकडे दोन लाख रुपये लाचेची मागणी केली होती. त्यामुळे त्यांनी या संदर्भात बीडच्या लाच लुचपत विभागाशी संपर्क करत तक्रार केली होती.
लाच लुचपत विभागाच्या अधिकाऱ्यांनी तक्रारीची पडताळणी केली असता सुरुवातीला दोन लाख रुपये लाच मागणाऱ्या सानप यांनी तडजोडीनंतर दीड लाख रुपये देण्यास सांगितले. त्यानंतर लाच लुचपत विभागाचे पोलीस उपअधीक्षक शंकर शिंदे यांच्यासह पोलीस निरीक्षक युनूस शेख, सुरेश सांगळे, श्रीराम गिराम, भरत गारदे, अमोल खरसाडे, हनुमंत गोरे, संतोष राठोड, अविनाश गवळी, सुदर्शन निकाळजे, अंबादास पुरी व गणेश मेहत्रे यांच्या पथकाने सानप याला पकडण्यासाठी बुधवारी सापळा लावला होता.
तक्रारदाराकडून लाचेचा एक लाख रुपयांचा पहिला हप्ता घेताना लाचखोर मंडल अधिकारी सचिन सानप याला जिल्हाधिकारी कार्यालयासमोर नगर रस्त्यावर रंगेहात पकडण्यात आले. या कारवाईमुळे महसूल विभागात लाचखोर अधिकाऱ्यांचे धाबे दणाणले आहे.
