शुक्रवार, २३ ऑगस्ट
‘हा एक गंभीर स्वरूपाचा गुन्हा असून, आरोपींना जामीन दिल्यास समाजात चुकीचा संदेश पोहोचू शकतो,’असे महत्त्वपूर्ण निरीक्षण नोंदवत विशेष न्यायाधीश यु. एम. मुधोळकर यांनी गुरुवारी पोर्शे कार अपघात प्रकरणातील सर्व आरोपींचा जामीन अर्ज फेटाळला. त्यामुळे आरोपींचा येरवडा जेलमधील मुक्काम वाढला आहे.
अपघात प्रकरणातील अल्पवयीन मुलाची वैद्यकीय तपासणी करण्यापूर्वी त्याच्या रक्ताचे नमुने बदलून पुरावा नष्ट केल्याप्रकरणी मुलाचे वडील व बांधकाम व्यावसायिक विशाल अगरवाल, आई शिवानी, ‘ससून’च्या न्यायवैद्यक विभागाचा प्रमुख डॉ. अजय तावरे, आपत्कालीन विभागाचा मुख्य वैद्यकीय अधिकारी डॉ. श्रीहरी हाळनोर, अश्फाक मकानदार आणि अमर गायकवाड हे सर्वजण सध्या येरवडा कारागृहात आहे.
न्यायालयात दोषारोपपत्र दाखल झाल्यानंतर या सर्व आरोपींनी जामीनासाठी अर्ज केला होता त्यावर न्यायालयाने गुरुवारी आपला निर्णय दिला. त्यामुळे कारागृह बाहेर येण्याचे या आरोपींचे स्वप्न भंगले आहे. आपल्या ४५ पानांच्या आदेशात गुन्ह्यांच्या संदर्भात न्यायाधीश मुधोळकर यांनी विविध निरीक्षणे नोंदविले आहेत.
न्यायाधीशांनी नोंदविलेली निरीक्षणे…
विशाल आणि शिवानी अग्रवाल हे दोघे समाजातील आर्थिक दृष्ट्या प्रभावशाली व्यक्ती आहे. डॉ. अजय तावरे व डॉ. श्रीहरी हाळनोर यांच्यासह इतर आरोपींवर दबाव टाकून रक्ताचे नमुने बदलण्यात दोघे यशस्वी ठरले. त्यांना जामीन मिळाला तर ते साक्षीदारही फितूर करण्याची शक्यता आहे, असे न्यायाधीशांनी आपल्या आदेशात नमूद केले आहे.
या आरोपीचा अटकपूर्व जामिनासाठी अर्ज…
अल्पवयीन मुलासोबत कारमध्ये मद्याच्या नशेत असलेल्या त्याच्या दोन मित्रांच्या रक्ताचे नमुने बदलल्याप्रकरणी पोलीस शोध घेत असलेल्या अरुणकुमार सिंग (रा. विमाननगर) या आरोपीने न्यायालयात अटकपूर्व जाण्यासाठी अर्ज दाखल केला आहे.
कार परत मिळण्यासाठी अर्ज…
दरम्यान अपघातातील पोर्शे कार परत मिळण्यासाठी अगरवाल कुटुंबीयांनी बाल न्याय मंडळात अर्ज केला आहे. या अर्जावर येत्या बुधवारी (२८ ऑगस्ट) सुनावणी होईल.
