शनिवार, २४ ऑगस्ट
बदलापूर शाळेतील अल्पवयीन मुलींच्या लैंगिक छळ प्रकरणी राज्यात महाविकास आघाडीने सरकार विरोधात जोरदार भूमिका घेतली आहे. महाविकास आघाडीने आज महाराष्ट्र बंदची हाक दिली होती. मात्र, मुंबई उच्च न्यायालयाने बंद बेकायदेशीर ठरविल्याने मविआने निषेध आंदोलन केले.
संगमनेरमध्ये काँग्रेसचे नेते आमदार बाळासाहेब थोरात यांच्यासह महाविकास आघाडीतील पदाधिकारी, कार्यकर्त्यांनी शनिवारी बस स्थानक चौकात तोंडाला काळ्या पट्ट्या लावत मौन आंदोलन केले. त्यांच्यासोबत माजी आमदार डॉ. सुधीर तांबे, माजी नगराध्यक्ष दुर्गाताई तांबे, काँग्रेस तालुकाध्यक्ष डॉ. जयश्री थोरात सहभागी झाले होते.
बदलापूरसह महाराष्ट्रात अनेक ठिकाणी घडलेल्या लैंगिक अत्याचारांच्या घटनांचा व असंवेदनशील सरकारचा निषेध व्यक्त करण्यासाठी महाविकास आघाडीच्यावतीने आज शनिवारी (२४ ऑगस्ट) महाराष्ट्र बंदची हाक देण्यात आली होती. मात्र, माननीय उच्च न्यायालयाने परवानगी नाकारल्याने सदर महाराष्ट्र बंद मागे घेण्यात आला.
शुक्रवारी मुंबई उच्च न्यायालयाने राजकीय पक्षांना २४ ऑगस्ट किंवा त्यानंतरच्या कोणत्याही तारखेला प्रस्तावित महाराष्ट्र बंदची हाक देण्यास मनाई केली होती. अशा आंदोलनांमुळे सामान्य जनजीवन प्रभावित होईल, असे न्यायालयाने म्हटले होते. खंडपीठाने जुलै २००४ च्या उच्च न्यायालयाच्या निकालाचा संदर्भ दिला, ज्यामध्ये त्यांनी म्हटले होते की बंद किंवा संप हे असंवैधानिक कृत्य मानले जाईल.
त्यामुळे थोरात यांच्यासह संगमनेरमध्ये ‘लाडक्या लेकीच्या सन्मान आणि संरक्षणासाठी’ दोन तास सुरू असलेल्या या मौन निषेध जन आंदोलनात बाबा ओहोळ, सोमेश्वर दिवटे, निखिल पापडेजा, सुरेश थोरात, दिलीप पुंड, शिवसेनेचे माजी शहर प्रमुख अमर कतारी, युवा सेनेचे जिल्हाध्यक्ष अमित चव्हाण, शहर प्रमुख आप्पा केसेकर, नरेश माळवे, ॲड. दिलीप साळगट, कैलास वाकचौरे, राष्ट्रवादी काँग्रेसचे ज्ञानेश्वर गायकर, किरण घोटेकर आदींसह महाविकास आघाडीतील घटक पक्ष असलेल्या काँग्रेस, शिवसेना (उद्धव बाळासाहेब ठाकरे), राष्ट्रवादी शरद पवार गट, आरपीआय व पुरोगामी संघटनांचे पदाधिकारी कार्यकर्ते सहभागी झाले होते.
दरम्यान महाविकास आघाडीने बंद मागे घेतला असला तरी संगमनेरमध्ये बहुतांशी व्यावसायिकांनी स्वतःहून आपले व्यवसाय बंद ठेवत निषेध व्यक्त केला. शहरातील अन्य व्यवहार सुरळीत सुरू होते.
