शनिवार, ३१ ऑगस्ट
नागपूर – भारतीय जनता पक्षाचे आमदार परिणय फुके आणि त्यांच्या कुटुंबीयांविरोधात नागपूरच्या अंबाझरी पोलीस ठाण्यात कौटुंबिक छळवणुकीचा गुन्हा दाखल करण्यात आला आहे. आमदार फुके यांच्या मृत भावाच्या पत्नीने दिलेल्या तक्रारीवरून हा गुन्हा दाखल करण्यात आला आहे.
आमदार परिणय फुके, फुके यांचे वडील रमेश गोविंदराव फुके (वय ७२), आई रमा (वय ६७), नितीन फुके (वय ४०), पत्नी डॉक्टर परिणीता फुके (वय ४१) यांच्या विरोधात हा गुन्हा दाखल करण्यात आला आहे.
फुके यांचे मृत भाऊ संकेत फुके यांची पत्नी प्रिया यांनी दिलेल्या तक्रारीवरून हा गुन्हा दाखल करण्यात आला आहे. तक्रारीनुसार संकेत फुके यांना किडनीचा आजार होता. लग्नाच्या वेळी फुके कुटुंबीयांनी ही बाब लपवून ठेवली. आमचे कुटुंब समाजा त नावाजलेले असून राजकीय दबाव आणून आम्ही काहीही करू शकतो, तू शांत बसली नाही तर माणसे पाठवून तुझ्या आई बहिणीवर अत्याचार करवू, अशी धमकी देण्यात आली होती.
सप्टेंबर २०२२ मध्ये संकेतचा मृत्यू झाला. त्यानंतर काही दिवसांनी एटीएम, बँक पासबुक, पासवर्डच्या नोंदी, दागिने फुके कुटुंबियांनी हिसकावून घेतले. अताशा आशीर्वाद बिल्डर कंपनीत संकेत याचे ४०% शेअर्स होते ते परस्पर सासूच्या नावावर करण्यात आले.
संकेतच्या मृत्यूनंतर पत्नी प्रिया हिच्या युनियन बँकेच्या खात्यात चार कोटी रुपये आले होते. मात्र त्यातील ३.३० कोटी रुपये खोटी स्वाक्षरी करत रमेश फुके यांच्या खात्यात वळते करण्यात आले होते. बँक व्यवस्थापकाकडूनही या संदर्भात उडवा उडवीची उत्तरे दिली गेली. परीने व नितीन फुके यांनी जबरदस्तीने सह्या घेऊन पारडी येथील प्लॉट देखील विकल्याचे तक्रारीत म्हटले आहे.
कुटुंबीय आणि प्रिया यांच्यात घरगुती वादातून हा प्रकार घडला. भाऊ गेल्यापासून भांडण सुरू होते. मी दुसरीकडे राहतो, वाद मिटविण्याचा खूप प्रयत्न केला. आई-वडिलांनीही तिच्या विरोधात पोलीस तक्रार दाखल केली. मी दोन्ही बाजूंना समजावण्याचा प्रयत्न केला. वाद सोडविण्याचा प्रयत्न केला. तरीदेखील एफ आय आर मध्ये माझे नाव टाकण्यात आल्याने मला धक्का बसला असल्याचे आमदार परिणय फुके यांनी म्हटले आहे.
