शुक्रवार, ०४ ऑक्टोंबर
आगामी विधानसभा निवडणुका लक्षात घेत राज्य सरकारने मुख्यमंत्री माझी लाडकी बहीण योजना सुरू केली आहे. या योजनेअंतर्गत जूलैपासून दरमहा दीड हजार रुपये देण्यात येत आहे. या योजनेअंतर्गत भाऊबीज म्हणून दोन हप्ते एकत्रित देण्याचा निर्णय सरकारने घेतला असून आता ३००० रुपये बँक खात्यावर जमा होणार आहे. उपमुख्यमंत्री अजित पवार यांनी याबाबत घोषणा केली आहे.
भाऊबीज म्हणून दिल्या जाणाऱ्या या पैशात नोव्हेंबर महिन्याचा हप्ता देखील ऑक्टोंबरमध्येच मिळणार आहे. त्यामुळे बहिणींचे दिवाळी सरकार गोड करणार आहे. योजनेअंतर्गत आतापर्यंत पात्र ठरलेल्या लाभार्थी महिलांना तीन हप्ते मिळाले असून त्यांच्या बँक खात्यात ४५०० रुपये जमा झाले आहेत. या महिन्यात यात आणखी तीन हजार रुपयांची भर पडणार आहे.
त्यामुळे ऑक्टोंबरमध्येच नोव्हेंबर पर्यंतचे ७५०० रुपये लाभार्थी महिलांच्या बँक खात्यात जमा होतील. येत्या १० ऑक्टोंबरपर्यंत हे पैसे बँक खात्यात जमा होईल.
या योजनेत राज्य सरकारकडून जूलै पासून लाभार्थी महिलांना पैसे देण्यात येत आहे. त्यामुळे जुलै, ऑगस्ट व सप्टेंबर महिन्याचे पैसे अगोदरच जमा झाले आहे. आता ऑक्टोंबर व नोव्हेंबरचे होणार आहे. त्यामुळे सरकारने लाडक्या बहिणींसाठी आर्थिक मदतीचा हात मोकळा केल्याने सरकारी तिजोरीवर मोठा ताण पडणार आहे.
त्यातच येत्या काही दिवसात विधानसभा निवडणुकीची आचारसंहिता लागणार असल्याने या पार्श्वभूमीवर देखील हा निर्णय घेतला जात असल्याचे बोलले जात आहे.
